Elorda ákimi Altaı Kólginov pedagogtardy kásibı merekesimen quttyqtady. Alǵash ret qala basshysy atynan "Nur-Sultan qalasynyń qurmetti pedagogy" medaliniń ıegerlerine 833 myń teńge tólenedi. Sonymen birge birqatar oqý ornyna 9 mln teńgeden ákim granty berildi.
"Ár muǵalim turǵyndardyń saýatty ári laıyqty azamat bolýyna septigin tıgizip, bilim beredi. Muǵalimderimizdi kásibı merekeleri - Ustazdar kúnimen shyn júrekten quttyqtaımyn. Balalarǵa oqý materıalyn meńgerýge, túrli olımpıadalarda, baıqaýlarda jetistikterge jetýge ǵana emes, sonymen qatar olarǵa ózine, óz kúshine senýge, kásibin tabýǵa kómektesip kelesizder.
Elbasy Nursultan Ábishuly Nazarbaevtyń "zııatker urpaq" ıdeıasyna sáıkes memleket sapaly bilimge erekshe kóńil bóledi. Elordada jyl saıyn oqý oryndaryn salyp jatyrmyz. Bıyl salynǵan mektepter sany ótken jylmen salystyrǵanda eki esege artyq. Osy jyly 12 mektep salyndy. Kelesi jyly taǵy sonsha mektep salynady. Oqý oryndaryn zamanaýı jabdyqtarmen jabdyqtap, ınnovasııalyq tehnologııalardy engizemiz.
Memleket basshysy Qasym-Jomart Toqaev "pedagog mártebesi týraly" zańǵa qol qoıdy. Osy jyldyń 1 qańtarynan bastap pedagogtardyń jalaqysy 25% - ke, odan ári 2024 jylǵa deıin taǵy 25% - ke ósedi. О́tken jyly biz turǵyn úı satyp alý úshin áleýmettik járdemaqy túrinde 1 mln teńge kólemindk 275 turǵyn úı sertıfıkatyn óteýsiz negizde bóldik. Bıyl da ustazdarymyzǵa turǵyn úı jaǵdaıyn jaqsartýǵa kómektesemiz. Qazaqstandyq ıpotekalyq kompanııamen birlesip 1 myń áleýmettik páter beremiz. Bul páterler muǵalimderge, áleýmettik qyzmetkerlerge, polısııa qyzmetkerlerine, dárigerlerge, órt sóndirýshilerge, mádenıet jáne sport qaıratkerlerine beriledi. Túlekterge de qoldaý kórsetiledi. Mamandyqty tegin oqýǵa 900-ge jýyq grant bólindi. Qabyldanyp jatqan sharalar jumys úshin neǵurlym qolaıly jaǵdaı jasaýǵa jáne balalardyń sapaly bilim alyp, básekege qabiletti bolýyna baǵyttalǵan. Sizdiń qajyrly eńbegińiz úshin alǵys aıtamyn!",- dedi elorda ákimi Altaı Kólginov.
Elordalyq pedagogtarǵa "Halyq alǵysy", "Eńbek ardageri" medaldary, "Qazaqstan Respýblıkasynyń Bilim berý isiniń qurmetti qyzmetkeri" jáne Bilim jáne ǵylym mınıstrliginiń "Y.Altynsarın" tós belgileri, gramotalar jáne t.b. tabys etildi.
