Is-sharaǵa Mońǵolııa Úkimeti janyndaǵy Mádenıet jáne óner isteri jónindegi atqarýshy agenttik basshysy S.Nasagdolgor, "Abaıdyń qara sózderi" kitabynyń mońǵol tilindegi aýdarmasynyń avtory qoǵam qaıratkeri Sultan Táýkeı, mádenıet, syrtqy ister, bilim jáne ǵylym mınıstrlik ókilderi men jergilikti buqaralyq aqparat quraldary, sondaı-aq qazaq dıasporasynyń tanymal qaıratkerleri qatysty.
Keshti ashyp sóz sóılegen Qazaqstan Respýblıkasynyń tótenshe jáne ókiletti elshisi Jalǵas Ádilbaev bul eki tulǵanyń eń úlken jetistikteri, olardyń eńbekteriniń qoǵamdy damytý tujyrymdamalary jalpy adamzattyq qundylyqqa, aǵartýshylyq pen adamgershilik ıdeıalaryna negizdelgenin atap ótti.
Sonymen qatar, Memleket basshysy Qasym-Jomart Toqaev "Abaı jáne XXI ǵasyr" atty maqalasynda uly aqyn men fılosoftyń bizdiń halqymyzdyń odan ári rýhanı damýy úshin qajetti muralaryna erekshe nazar aýdarýymyz kerek dep jazdy.
"Ártúrli dáýirlerde ómir súrgenderine qaramastan, olardyń kózqarastary men pikirleri bir-birine uqsas. Olar – uly dalanyń uly tulǵalary", dep atap ótti qazaqstandyq dıplomat.
"Abaı Qunanbaıuly men ál-Farabı – kóshpendi halyqtyń, ıaǵnı qazaq halqy mádenıetiniń kórinisi. Osy eki uly oıshyldyń arasynda myńjyldyqtar jatsa da, olardyń dúnıetanymy bir jáne shyǵarmalary bir mezgilde jazylǵan sııaqty", dedi óz sózinde Mońǵolııa Úkimeti janyndaǵy Mádenıet jáne óner isteri jónindegi agenttiktiń basshysy S.Nasagdolgor.
Kesh barysynda mońǵol tilindegi "Abaıdyń qara sózderi" kitabynyń tusaýkeseri ótti. Kitaptyń avtory, dıplomat, professor, tarıhshy, jazýshy jáne aýdarmashy Sultan Táýkeıuly Abaı murasy – qazaq halqynyń ǵasyrlar boıy jınaqtalǵan jáne barlyq danalyqty boıyna sińirgen rýhanı baılyq ekenin basa aıtty. Onyń shyǵarmalary ólmeıdi, ýaqyt óte kele olar ózekti bolyp, áleýmettik, mádenı jáne rýhanı ómirge arnalǵan nusqaýlardy anyqtaıdy.
Abaı Qunanbaıulynyń ómiri men shyǵarmashylyǵy týraly Mońǵolııadaǵy qazaq dıasporasynyń belgili abaıtanýshylary T.Etekbaı men A.Jambyldyń baıandamalary tyńdaldy. Sonymen qatar, kesh barysynda Abaıdyń "Jelsiz túnde jaryq-aı" jáne "Aıttym sálem qalamqas" týyndylary mońǵol halqynyń ulttyq aspaby morınhýrmen oryndaldy. Budan basqa, keshke kelgen qonaqtar qazaq dıasporasynyń daryndy jastarynyń oryndaýynda kópshilik súıip tyńdaıtyn "Kózimniń qarasy" jáne "Segiz aıaq" mýzykalyq shyǵarmalaryn, sondaı-aq mánerlep oqylǵan Abaıdyń óleńderi men qara sózderin tamashalady. Kesh barysynda Abaı men ál-Farabıge arnalǵan fotokórmeler men kitap kórmeleri uıymdastyryldy. Kesh sońynda qonaqtarǵa uly oıshyldar Abaı men ál-Farabıdiń ómiri men shyǵarmashylyǵy týraly derekti fılmder kórsetildi.
Qýat ÝATQAN, jýrnalıst
Ulan-batyr qalasy
