Bir keremeti, otandastarymyzdyń deni alǵashqy aınalymda álemdik reıtıngte ózderinen áldeqaıda joǵary turǵan oıynshylarmen kúsh synasqanyna qaramastan, sheberliktiń shynaıy úlgisin kórsetti. Ásirese erler erlerdi. ATR tiziminde 56 orynda turǵan Aleksandr Býblık fransııalyq Gael Monfıspen sheberlik baıqasty. Birden aıta keteıik, ol qatardaǵy kóp tennısshilerdiń biri emes. Búgingi tańda álemniń toǵyzynshy raketkasy atanyp otyrǵan Monfıs kezinde Rolan Garros pen AQSh-tyń ashyq birinshiliginiń jartylaı fınalyna deıin jetip, ATR týrnırlerinde 10 márte top jardy. Desek te qarsylasynyń ataǵynan esh qaımyqpaǵan Býblık bul básekede 6:4, 7:5, 3:6, 6:3 esebimen basymdyq tanytty. Úzdikter tiziminde 87 satyǵa jaıǵasqan Mıhaıl Kýkýshkın álemniń 15-shi raketkasy, toǵyz birdeı dúbirli dodada daralanǵan ıtalııalyq saqa sportshy Fabıo Fonınıdiń osal tusyn ońaı tapty – 7:5, 3:6, 7:6, 6:0.
Áıelder saıysynda Iýlııa Pýtınseva (27 oryn) belgııalyq Krıstın Flıpkenstiń (80 oryn) tas-talqanyn shyǵardy – 6:1, 6:2. Elena Rybakına (18 oryn) rýmynııalyq Sorana Kyrstıany (83 oryn) qapy qaldyrdy – 6:0, 6:3. Tanymal sheteldik oıynshylardyń qazirgi qarqyny biraz báseńdegenimen, kezinde olardyń talaı dúbirli dodalarda ábden ysylyp, eleýli tabystarǵa qol jetkizgenin jankúıerler jaqsy biledi.
Biraq qýanyshymyz uzaqqa sozylmady. Ekinshi kezeńde jerlesterimiz túgel utylyp, alǵashqy kúnderdegi kóńil kúıimiz nildeı buzyldy. Bir ókinshtisi, olardyń úsheýi álemdik reıtıngte ózderinen áldeqaıda tómen turǵan oıynshylarǵa ese jiberdi. Atap aıtsaq, Pýtınseva argentınalyq Nadııa Podoroskaǵa (131 oryn) jol berdi – 3:6, 6:1, 2:6. Rybakına fransııalyq Fıona Ferrodan (49 oryn) utyldy – 3:6, 6:4, 2:6. Kýkýshkın ıspanııalyq Pedro Martınes-Porterodan (105 oryn) aılasyn asyra almady – 3:6, 1:6, 0:6. Tek Býblıktiń ǵana qarsylasynyń deńgeıi ózimen shamalas boldy. Ony ıtalııalyq Lorenso Sonego san soqtyryp ketti – 6:7, 1:6, 5:7. Sóıtip jarys jolynda birde-bir tennısshimiz qalmady.
«Úlken dýlyǵa» sanatyna jatatyn jarystardyń júlde qory qomaqty ekeni barshaǵa málim. Bıylǵy Rolan Garrosta onyń mólsheri 38 mln eýrony qurap otyr. Bizdiń sportshylar Parıjde sátsiz óner kórsetkenderine qaramastan, materıaldyq jaǵynan paıda tapty. Máselen, alǵashqy aınalymnan asa almaǵan Zarına Dıas 60 myń eýrony ámııanyna salsa, ekinshi kezeńde súringen Iýlııa Pýtınseva, Elena Rybakına, Aleksandr Býblık jáne Mıhaıl Kýkýshkın 84 myń eýrony qaltalaryna basty. Tennısshilerdi bul soma qanaǵattandyra ma, álde joq pa, ol jaǵy bizge beımálim. Biraq ózge sport túrleri ókilderi úshin bul edáýir qarajat. Al qarapaıym halyq úshin mol baılyq dep aıtsaq, esh aǵattyǵy joq.
Eger otandastarymyz budan da táýir oınaǵanda, odan da kóp aqshaǵa ıelik etetin edi. Rolan Garrostyń úshinshi kezeńine ótkender 126 000 eýrony ıelenedi. Tórtinshi aınalymǵa shyqqandar 189 000-dy enshileıdi. Shırek fınalda óner kórsetkenderdiń esepshottaryna 283 500 eýro aýdarylady. Sol mejeden súrinbeı ótkender 425 250-ǵa baııdy. Fınalǵa shyqqandar 850 500 eýrony ıemdenedi. Al erler men áıelder arasyndaǵy jarystyń jekelegen saıysynda jeńimpaz atanǵan tennısshilerge tıesili syıaqy 1 600 000 eýrony quraıdy. Al ondaı baq kimderge buıyratynyn aldaǵy kúnderi biletin bolamyz.
