Reseı chempıonatynyń 10-týr aıasynda Ekaterınbýrgtiń «Ýral» komandasymen ótken oıynda Zaınýtdınov birinshi mınýttan bastap alańǵa shyǵyp, ekinshi taımnyń 52-mınýtynda óziniń SSKA quramyndaǵy alǵashqy golyn soqty. Bul ýaqytta «armııashylar» bir fýtbolshy kem bolyp oınap jatqan-dy. Araǵa 4 mınýt salyp SSKA-nyń taǵy bir fýtbolshysy Konstantın Maradıshvılı «Ýral» qaqpasyn dál kózdep, komandasyna 2:0 esebimen jeńis syılady.
Osylaısha, 22 jastaǵy Zaınýtdınov «armııashylar» jeıdesindegi altynshy matchyn ótkizip, birinshi márte tolyq 90 mınýt oınap shyqty jáne alǵashqy golyn soqty. 25 tamyzda Máskeýdiń SSKA klýbyna aýysqan Baqtıer Zaınýtdınov – SSKA quramynda oınap jatqan úshinshi fýtbolshy. Buǵan deıin Máskeý komandasynda Ashat Qadyrqulov jáne Maksım Nızovsev sekildi jerlesterimiz dop tepken. О́kinishke qaraı eki fýtbolshymyz da gol soǵyp, mergendigimen kózge túse almaǵan.
