"Jármeńkeniń jarnamasyn áleýmettik jeliden kórip, qatty qýandym. Úıde kerek bolyp qalady deıtin, biraq bosqa turǵan zattar kóp. Solardyń bárin osynda bergim kelip otyr. Kitap, sómkeler, kıimder bar. Olardy qoqysqa tastaýǵa qımaımyn. Ári onyń ornyna jańa nárse alýǵa bolady, ol tipti keremet. Jıi uıymdastyrylsa eken", – dedi elorda turǵyny Nurjigit Tasbolatov.
Sharany respýblıkalyq biryńǵaı "Jas Ulan" balalar men jasóspirimder uıymy Green tall áleýmetik dámhanasymen birlesip, "BizBirgemiz: Taza Alem" jalpyulttyq jobasynyń aıasynda uıymdastyrdy. Uıymdastyrýshylardyń aıtýynsha aıyrbastyń bul túri zattarǵa jańa ómir syılap qana qoımaı, ýaqyt pen qarajatty, túrli resýrsty únemdeýge septigin tıgizedi.
"Shara maqsaty ekinshi ómir syılaý, astarynda ekologııa máselesi tur. Turǵyndarǵa eski zatty suryptaýǵa bolatynyn kórsetý. Bul elorda boıynsha ekinshi ret ótkizilip jatyr. Jármeńkege túrli zattar alyp kelýde. Kitap, kıimder, kúrtesheler, aıaq kıimder men túrli áshekeı-buıymdar, sý jańa gadjetterdi de kórýge bolady. Aldaǵy ýaqytta da uıymdastyrý oıda bar. Kelýshiler dán rıza", – dedi respýblıkalyq biryńǵaı "Jas Ulan" balalar men jasóspirimder uıymynyń tóraıymy Dınara Sádýaqasova.
Jármeńke sońynda qalyp qoıǵan zattar qaıyrymdylyq uıymdary men áleýmettik dúkenderge tapsyryldy.
