Test suraqtar men jaýap nusqalary bar saýaldama túrinde usynylǵan. Testiń jumys isteý qaǵıdasy neırondyq jelige – jasandy ıntellekt tehnologııasyna negizdelgen. Neırojeli COVID-19 vırýsyn juqtyrý yqtımaldyǵyn ondaǵy COVID-19 negizgi belgileri, táýekel toptary jáne Densaýlyq saqtaý mınıstrliginiń resmı hattamalary týraly baǵdarlamalanǵan aqparatty eskere otyryp anyqtaıdy. Ázirleýshiler test nátıjeleri naqty dıagnozdy bermeıtinin jáne medısınalyq qorytyndy emes ekenin eskertedi. Alaıda osy arqyly qazaqstandyqtardyń COVID-19 vırýsyn juqtyrý yqtımaldyǵyna qatysty óz densaýlyǵynyń jaı-kúıin óz betinshe taldaýǵa múmkindigi bar.
Úsh aı boıy komanda saýaldama saıtynyń ınterfeısi men fýnksıonaldyǵy boıynsha muqııat jumys istedi. Joba mentory – kásipker, medısına akademııasynyń túlegi jáne DBA EU Business School (Shveısarııa) iskerlik ákimshilendirý doktory Seıitjan Sypabekov. Komandanyń basqa eki qatysýshysy – Nazarbayev University Injenerııa jáne sıfrly ǵylymdar mektebi bakalavrıat baǵdarlamalarynyń túlekteri Iýsýp Týmgoev pen Amanjol Shýngeev. Qazir ekeýi de NÝ magıstratýrasynda, Iýsýp Data Science salasynda, al Amanjol Medısına mektebinde Sport Medicine and Rehabilitation salasynda oqýyn jalǵastyrýda.
«Bizdiń komandada Seıitjan kásibı medısınalyq qoldaýdy qamtamasyz etedi. Bizdiń mindetimiz – testi ázirleý, onyń medısınalyq quramdas bóligi úshin Amanjol jaýapty, al men tehnıkalyq aspektilerge jaýap beremin», deıdi Iý.Týmgoev.
Tegin jáne qarapaıym test tapsyrý úshin https://covistop.asia/covid-test / saıtyna ótý jáne jaýaptarǵa 5 mınýt jumsaý jetkilikti. Test nátıjelerine baılanysty respondent odan ári usynymdar alady. Qazir test aqparattyq sıpatta jumys isteıdi, bolashaqta ázirleýshiler medısınalyq mekemeler men COVID-19 jónindegi jedel jelilerdiń baılanys derekterin, sondaı-aq vırýs juqtyrý yqtımaldyǵy joǵary áreketter algorıtmin qosýdy josparlap otyr.
«Test Nur-Sultan qalasynyń Ulttyq ǵylymı kardıohırýrgııalyq ortalyǵy mamandarynyń moderasııalaýynan ótti. Test nátıjeleri kez kelgen aqparattyq júıege, onyń ishinde elimizdegi densaýlyq saqtaý júıesine ıntegrasııalanýy múmkin. Derekter kóbinese derbestendirilgen sıpatqa ıe. Bizdi qoldaǵandardyń barlyǵyna jáne COVID-19-dy juqtyrýdyń eń asqynǵan jaǵdaılary bar pasıentterdi emdeýmen aınalysqan mamandarǵa alǵys aıtamyz», deıdi Iý.Týmgoev.
Test áleýmettik kommersııalyq emes joba ekenin atap ótken jón. Testiden ótý jáne nátıjelerdi alý tegin. Bolashaqta ázirleýshiler test nátıjeleriniń dáldigin arttyrýdy josparlap otyr jáne jasandy neırondyq jelini paıdalanýdan basqa, mashınalyq oqýdy da qosqysy keledi.
