Qarýly Kúshterde áskerlerdi qorytyndy tekserý bastaldy. Eki apta ishinde áskerı qyzmetshiler saptyq, memlekettik-quqyqtyq, kásibı, arnaıy, atys jáne dene shynyqtyrý daıarlyǵy boıynsha synaqtar tapsyratyn bolady. Budan bólek, jalpyáskerı jarǵylar boıynsha bilimderi tekseriledi. Radıasııalyq, hımııalyq jáne bıologııalyq qorǵaý jónindegi normatıvter oryndalady. Árbir bólimshe daıyndyq deńgeıine sáıkes baǵa alady.
Osy jyly koronavırýstyq ınfeksııa pandemııasy jeke quramdy oqytýǵa belgili bir ózgertýler engizdi. Áskerı qyzmetshilerdiń tótenshe jaǵdaı jáne karantın rejımin qamtamasyz etý jónindegi negizgi is-sharalarǵa qatysýyn eskere otyryp, is-sharalardy ótkizý merzimderi men olardyń formaty ózgerdi.
Koronavırýstyq pandemııanyń órshýi kezinde armııa tótenshe jaǵdaıdy qamtamasyz etý sharalaryna qatysty. 10 myńnan astam áskerı qyzmetshiler tosqaýyl beketterinde qyzmet atqardy. Eldi mekenderdi patrýldeýge qatysyp, áleýmettik mańyzy bar nysandardy óńdedi. Sonymen qatar, birqatar áskerı medısınalyq mekemeler KOVID-stasıonar retinde qaıta beıindeldi. Áskerı gospıtalder men lazaretterdiń dárigerlik-meıirbıkelik brıgadalary jergilikti densaýlyq saqtaý organdarynyń qaramaǵyna jiberildi.
Soǵan qaramastan armııanyń jaýyngerlik ázirligin qoldaý jónindegi barlyq is-sharalar tolyq kólemde oryndalýda. Qoıylǵan maqsattarǵa jetý úshin 200-den astam túrli jattyǵýlar, atys daıyndyǵy aıasynda 20 myńnan astam jaýyngerlik atys uıymdastyryldy. Sondaı-aq jaýyngerlik mashınalar men avtomobıl tehnıkasyn júrgizý boıynsha 16 myńnan astam sabaq ótti. Bul rette sabaqtar táýlik boıy ótkizildi. Bir jyl ishinde Qarýly Kúshterde 60 myńnan astam maman daıarlandy.
Elimizdegi karantın sharalarynyń jumsarýyna baılanysty áskerıler aýqymdy is-sharalarǵa kiristi.
Qarýly Kúshter úshin mańyzdy oqıǵa "Mátibulaq" polıgonyndaǵy "Aldaspan-2020" jedel-taktıkalyq komandalyq-shtabtyq oqý-jattyǵýy boldy. Áskerler oqý-jattyǵýdy ótkizý ornyna marsh jasap, arnaıy áskerı operasııany daıyndaý jáne ótkizý boıynsha mindetterdi pysyqtady. Aıta ketý kerek, oqý-jattyǵýdyń ereksheligi qazirgi qarýly qaqtyǵystarda soǵys júrgizý tájirıbesin engizý.
Sonymen qatar Áýe qorǵanysy kúshteri "Taza aspan-2020" jedel-taktıkalyq komandalyq-shtabtyq oqý-jattyǵýyna qatysty. Oqý-jattyǵý barysynda áskerı avıasııa jáne Áýe shabýylyna qarsy qorǵanys bólimsheleri shartty áýe qarsylasyn kórsetý boıynsha mindetterdi pysyqtady. Oqý máselelerine áýe shabýylyna qarsy qorǵanys boıynsha jaýyngerlik kezekshilik kúshterin qoldaný, ÁShQQ áskerleri toptarynyń jaýyngerlik is-qımyldardy júrgizýi boıynsha mindetter kirdi.
Áskerı-teńiz kúshteri Kaspıı akvatorııasynda teńiz ekonomıkalyq qyzmeti nysandaryn qorǵaý jáne teńiz jaǵalaýyn qorǵaý boıynsha oqý-jattyǵý ótkizdi.
Qazirgi ýaqytta Tilendıev kentindegi oqý-jattyǵý polıgonynda el tarıhyndaǵy alǵashqy keshendi bitimgershilik oqý-jattyǵýy jalǵasýda. Onda jeke quram daǵdarysty aýdanda beıbitshilikti qoldaý jónindegi bitimgershilik operasııany daıyndaý jáne júrgizý jónindegi mindetterdi pysyqtaýda.
Elimizdiń barlyq óńirlerinde "Altyn Jebe" arnaıy operasııalar kúshteri quramdastarynyń kúshteri men quraldaryn keshendi tekserý júrgizilýde. Bir aı ishinde áskerı qyzmetshiler kúshter men quraldardy qoldanýdy uıymdastyrý máselelerin pysyqtaıdy, sondaı-aq arnaıy oqý-jaýyngerlik mindetterdi oryndaıtyn bolady.
