Qalamyzdyń 2050 jylǵa deıingi damý Strategııasy, 2023 jylǵa deıingi Keshendi damý jospary ázirlenip, bekitildi. Eki jylda qalada kóptegen oń ózgerister bolyp, áleýmettik-ekonomıkalyq kórsetkishter jaqsardy. Máselen, qalanyń damý parametrlerine qaraıtyn bolsaq, ótken eki jylda ekonomıkanyń ósim dınamıkasyn baıqaýǵa bolady.
Atap aıtqanda, ónerkásip óndirisi 1,3 esege, aýylsharýashylyq ónim kólemi 1,2 esege, kásipkerlik sýbektileriniń sany 15 myńǵa, olarmen óndirilgen ónim 1,5 esege artqan. Sonymen qatar, osy jyldar ishinde qalaǵa 782 mlrd.teńgeden astam ınvestısııa tartyldy, 1 mıllıon sharshy metrge jýyq turǵyn úı salyndy. Ortalyqtandyrylǵan aýyz sýmen qamtý kórsetkishi 93 paıyzdan 94,7 paıyzǵa, balabaqshamen qamtý kórsetkishi 94,3 paıyzdan 100 paıyzǵa jetti.
Indýstrıaldy-ınnovasııalyq damý baǵdarlamasy aıasynda 2 jylda 18 kásiporyn ashylyp, 1 myńnan astam adam turaqty jumyspen qamtyldy. Budan bólek, megapolıstiń bıýdjeti artyp, bıylǵy jyly qala bıýdjeti 452,5 mlrd. teńgeden asyp otyr, onyń 47 paıyzy áleýmettik salaǵa baǵyttalǵan.
