Úıdiń aýlasynda oınap júrgen top balanyń biri baıqamaı beti eski kórpemen jabylǵan, tereńdigi alty metrge jetetin ashyq qudyqqa túsip ketedi. Ata-anasy bolǵan jaıdy balanyń qasynda júrgen ápkesinen bilipti. «Vova qulap ketti! Vova qulap ketti!» dep qaıtalaı bergen kórinedi. Qudyqtyń ishinen úzdige shyqqan daýystan balanyń keptelip qalǵany belgili bolady. Alaıda ata-ana qansha jantalasqanymen balany óz kúshimen qutqara almaıdy. Ýaqyt bolsa zymyrap ótip jatyr. Tek keshke qaraı ǵana órt sóndirý bólimine habar berip, kezekshiliktegi jigitter dereý qutqarýǵa attanady. Olar aýylǵa aýdan ortalyǵynan nebári 20 mınýtta jetip, jaǵdaıdy kózben kórgen soń tez arada shuńqyrdy qaza bastaıdy. Ekskavator men krandy kómekke aldyrady. Uzaq ýaqyt boıy tózimdilik tanytqan balaqaıdy batyr dep baǵalap, Vovaǵa jiger beredi.
Sóıtip shuńqyr da qazylady. Endi balany shyǵarý kezinde onyń odan ári túsip ketpeýi úshin qudyqtyń naqty qaı deńgeıinde turǵanyn anyqtaý qajet bolypty. О́rt sóndirýshiler shuńqyrǵa túsip, kózge kórinbeıtin jerde arnaıy quralmen tesik jasap, armatýrany ótkizedi. Boldy! Turaqtylyq bar! Bólimshe komandıri, azamattyq qorǵaý starshınasy Erjan Ospanov áriptesteriniń kómegimen balaǵa kómek kórsetý úshin qudyqqa ózi túsip, dereý balaǵa jarmasady. Balaqaıdy ózine qysyp ustap alǵan soń ózge qutqarýshylar ekeýin joǵaryǵa kótere bastaıdy. Aýyldyń barlyq turǵyny órt sóndirýshiler júrgizgen osy qutqarý operasııasynyń kýágerleri boldy.
Erlik eskerýsiz qalǵan joq. Elbasy Nursultan Nazarbaevtyń 2012 jylǵy 5 jeltoqsandaǵy Jarlyǵymen áskerı jáne qyzmettik boryshyn oryndaý kezinde kórsetken erligi men janqııarlyǵy úshin Jelezın aýdanyn kúzetý boıynsha №16 órt sóndirý beketiniń azamattyq qorǵaý starshınasy Erjan Ospanov úshinshi dárejeli «Aıbyn» ordenimen marapattaldy.
Erjan Ospanov ózi qutqarǵan balamen kúni búginge deıin aralasyp júredi. Osy kúni Vladımır Shtýs esimdi álgi balaqaı osy aýyldaǵy jalpy bilim beretin orta mekteptiń 4-synybynda oqıdy. «Men ony kórgen saıyn ishim jylıdy. Ony óz ulymdaı kóremin. 2012 jyly bári oıdaǵydaı ótkenine qýanyshtymyn», dep aǵynan jaryldy E.Ospanov.
Aıdana JAQYPOVA
Pavlodar oblysy
