Jyl saıyn poshta qyzmetkerleri baspasózge jazylý naýqanyn joǵary deńgeıde uıymdastyrady – aldyn ala gazet ókilderi men oqyrmandar arasynda kezdesýler uıymdastyryp, gazet-jýrnaldarǵa jazylýdyń mańyzdylyǵy, qajettiligi týraly túsinik beredi, jyl saıyn qubylyp turatyn basylymdardyń baǵasy jaıynda aıtyp, jetkizedi. Jazylym naýqany bastalysymen poshta qyzmetkerleriniń de jumysy kóbeıedi – árbir kúni jazylǵan adam sanyn, qarajatyn esepteý qıynnyń-qıyny.
Biraq, qazir gazet-jýrnaldarǵa jazylýshylar sany nópir, úlgerý múmkin emes dep aıtýǵa da kelmeıdi. Oǵan birinshi sebep – ǵalamtor kókjıeginiń keńeıe túsýi bolsa, ekinshiden basylymdar baǵasynyń qymbattyǵy. Bir jylǵa tolyqtaı jazylý baǵasy on myńnyń o jaq-bu jaǵy bolyp keletin basylymdarǵa jazylýǵa kez kelgen qarapaıym adamnyń qaltasy kótere bermeıdi. Sondyqtan olar ózderi qalaǵan basylymdardy kompıýter, smartfondar arqyly aqtaryp, elektrondy nusqasyn taýyp oqýdy tıimdi sanaıdy.
Al gazet-jýrnal taratýdaǵy poshta qyzmeti de syn kótermeıdi. Sómkeni ıyǵyna asyp alyp, artyq gazet-jýrnaldy qolyna býdalaı ustap úı-úıdi, alys shaǵyn aýdandardy jaıaý aralap, birneshe qabattarǵa kóteriletin qyz-kelinshekterdiń jumysy aýyr, ári aıanyshty. Tildesip kórý arqyly jalaqylarynyń da kóńil kónshitpeıtindigin bildik. Alys aýyldar túgili oblys ortalyǵyndaǵy oqyrmandardyń gazet-jýrnalynyń ýaqtynda kelmeıtindigin, basylymnyń eki-úsh nómiriniń jınaqtalyp bir-aq keletinin, onyń ózi túgel emes bolǵandyqtan, tıisti oryndarǵa telefon soǵyp qajetti sandaryn suratyp alýǵa májbúr ekenimiz jasyryn emes. Qaladaǵy jaǵdaıy osy bolǵanda, aýyldarǵa aptalap, múmkin aılap baratyny belgili, eger gazet-jýrnalǵa jazylǵan adam bolsa...
Poshta qyzmetiniń sapasy týraly talaı aıtylyp ta, jazylyp ta júr. Poshta qyzmetine júginip, qarjysyn tólep jazylǵan basylymyń mezgilinde esik aldyna kelip turmaǵasyn renjıtiniń de ras, biraq jazylymdy uıymdastyrýǵa atsalysyp, mardymsyz eńbekaqyǵa bola jaıaý-jalpy gazet-jýrnal taratyp júrgen jandarǵa qarap olardyń jumysyna min taqqyń da kelmeıdi, renjı de almaısyń...
Sonymen, poshta qyzmetine kózqaras qubylyp tur – renjıik pe, joq pa?
Mańǵystaý oblysy
