Petropavldyń "Egemen Qazaqstan" kóshesiniń boıyndaǵy jataqhana turǵyndary birneshe jyl boıy únemi aıǵaı-shý, tóbeles, urys-keristen ábden zárezap bolǵan edi. О́ıtkeni munda jumys istemeıtin, araq-sharapqa burylyp ketken erkek-áıel kóp bolatyn. Bulardy tek qatań jaýapkershilikke tartý arqyly ǵana túzeýge bolatyn edi.
Tártip saqtaýǵa belsene kirisken ýchaskelik ınspektorlar árbir shaqyrý saıyn basbuzarlardy noqtalaýdan jalyqpady. Eger olar óz isterine júrdim-bardym qarap, kóz aldaý úshin ǵana kórinip, qaıtyp ketetin bolsa, tártipsizdik jalǵasa berer edi. Biraq ýchaskelik ınspektorlar óz isterin túpkilikti oryndap, basbuzarlardyń emin-erkin oıqastaýyna jol bermedi. Sonyń arqasynda aqyry tártip ornap, qazir turǵyndardyń ýchaskelik ınspektorlarǵa aıtar alǵysy sheksiz. «Bizben birge bolǵandaryńyzǵa zor alǵys aıtamyz», dep jazypty "Ekvator" PIK tóraıymy Oksana Babykpaeva qalalyq polısııa bastyǵyna jazǵan hatynda.
"Ýchaskelik polısııa ınspektory Ashat Dárkeev pen burynǵy ınspektor Elnurǵa (tegi esimde joq) zor alǵys bildirgim keledi. Biz, birlese otyryp, úsh jyl boıy zańǵa baǵynbaıtyn azamattarmen kúrestik. Túptiń túbinde biz jeńip shyqtyq. Tynyshtyqta ómir súrip jatqanymyzǵa bir jyldyń júzi boldy. Qazir bizge jańa ýchaskelik polısııa ınspektory qyzmet kórsetedi, shaqyrsań birden keledi. Jigitterge de, basshylyǵyna da raqmet. Adal, tártipti ınspektorlar tek ádil ári jaqsy basshylarda ǵana bolady! Bizben birge bolǵandaryńyzǵa zor alǵys", dep jazypty ol.
PIK tóraıymy polısııanyń jumysy týraly óziniń rızashylyq pikirin WhatsApp-ta qurylǵan "SQO aýlalaryn monıtorıngileý" tobyna joldaǵan eken. Bul chat PIK tóraǵalaryn, jergilikti atqarýshy bılikti jáne jurtshylyqty biriktirdi. Sońǵy kezderi sıfrlyq resýrstardyń kómegimen qurylǵan mundaı ashyq áńgimelesý, kómekke muqtaj jandarǵa jedel qol ushyn sozýǵa septigin tıgizýde. Bildirilgen pikirler – ýchaskelik polısııa ınspektorlarynyń tıimdi jumys isteıtinderin kórsetedi. Prezıdent óziniń Joldaýynda «qoljetimdi polısııa» qaǵıdatyn qamtamasyz etýdi tapsyrdy ǵoı. Biz osy talapty múltiksiz oryndaýǵa tıispiz. Sonyń ishinde ýchaskelik ınspektorlardyń halyqpen osyndaı ózara qarym-qatynasy tapsyrmany iske asyrýǵa septigin tıgizedi", deıdi Petropavl qalasy PB bastyǵynyń birinshi orynbasary Álibek Ǵabdýllın.
Qazir Petropavlda 13 aımaqtyq polısııa pýnkti jumys isteıdi, onda 97 ýchaskelik polısııa ınspektory qyzmet etedi.
"О́z ýchaskelik ınspektoryńyzdyń baılanys telefonyn SQO PD resmı akkaýnttarynan bilýińizge bolady" degen habarlandyrýdy árbir úıdiń kireberisindegi habarlandyrýlardan jıi kórýge bolady.
