Tamyry tereń, kókjıegi kórkem maqalany Abaı mýzeıiniń qýanyshy dep qabyldadyq. Onyń sebebi de joq emes. Bizdiń mýzeıde abaıtanýǵa arnalǵan arnaıy ekspozısııa bar. Elbasynyń «Abaı amanaty» maqalasy bizge jol kórsetti, tyń oılar týdy. Sondyqtan bıik parasatpen jazylǵan maqala – Abaı mýzeıiniń qýanyshy.
Elbasy osy maqalasynda bizdiń mýzeı týraly jyly lebizin bildirgenine shyn rıza boldyq. Nursultan Ábishuly Nazarbaev: «Abaıdyń ómiri men shyǵarmashylyǵyn tutas qamtıtyn «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeı quryldy. Jıdebaıda úsh júz alpys áýlıeli meken Mańǵystaýdan ákelingen ulýtastardan aqshańqan kúmbezdi Abaı-Shákárim kesenesi turǵyzylyp, onyń ashylý rásiminde bul orynnyń endi ár qazaq úshin rýhanı Mekkege aınalǵanyn atap óttim», deıdi maqalasynda.
Oraıy kelgende aıta keteıin, qazirgi ýaqytta Jıdebaıdyń halyqaralyq atlasy jasalýda. Abaı akademııasymen birlesip ázirlenetin atlas úsh tilde basylyp shyǵarylmaq. Atlasty qurý maqsatynda myqty fotograftar jumys istedi. Basylymda Jıdebaıdyń flora, faýna, landshafty, bıoalýantúrliligi men tarıhı jerleri kórsetiledi. Jalpy, bizdiń mýzeı ǵylymı ortalyqqa aınalý kerek. Mýzeıdiń ǵylymı tujyrymdamasy ázirlendi. Hakim Abaı týraly 100 tomdyq kitap shyǵarý josparlanyp otyr. Ol úshin mýzeı qoryndaǵy materıaldar jetkilikti. Josparlaǵanymyzdaı, jyl saıyn júıeli túrde 10 tomnan jaryq kórip otyrady. Bul jınaq Abaıtaný salasyna qyzyǵýshylyǵy bar kez kelgen adamǵa qoljetimdi bolǵanyn qalaımyz.
Abaı mýzeıin Qazaqstannyń túkpir-túkpirinen, shetelderden qonaqtar arnaıy izdep keledi. Tuńǵysh Prezıdentimiz aıtqandaı, «Jıdebaı-Bóriliniń» rýhanı Mekkege aınalǵany osy emes pe?! Elbasynyń «Abaı amanaty» atty maqalasy bizge qýanyshpen qatar úlken jaýapkershilik te júktedi. О́ıtkeni tanymdyq deregi mol maqalada Abaı mýzeıiniń mazmunyn ashatyn oılar kóp.
Turdyqul Shańbaı,
«Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń dırektory
