Qaladaǵy «Qurylysshy-2» páter ıeleri kooperatıviniń qyzmetkerleri áýpildektiń árbir qımylyn qyzyqtap, ádemi úlpildek qaýyrsyndaryn sıpap kórip, mundaı qusty birinshi ret kórip turǵandaryn tamsanyp aıtady. Beıbaq qus ótken jumada Gogol kóshesiniń boıyndaǵy 146-shy úıdiń mańynan tabylypty.
– Tapsyrysty oryndap bolyp, esep berý úshin keńsege qaraı kele jatyr edim, áldebir qustyń jer baýyrlap ushyp bara jatqanyn baıqadym. Kóp uzamaı anadaı jerge baryp qondy da, bir qanatyn súıretip bir-eki attap baryp kilt toqtaı qaldy. Janyna jaqyndap baryp edim, qashýǵa shamasy joq, ábden álsirep qalypty. Áp-ádemi, úkideı jumsaq úlbiregen qus eken. Qoınyma qysyp, kóterip úıge alyp kelip, kútim kórsete bastadym, – deıdi kooperatıv slesari Grıgorıı Kýlıchenko.
Demalys kúnderi Grıgorııdiń úıinde bolǵan áýpildek ál jınap alǵan soń, úı ıesine aıbat shege bastaǵan. Sondyqtan qusty kooperatıv keńsesine kóshirip, jumys kabınetindegi shkaftyń ishinde ustaýǵa týra kelgen.
– Qazir adamdardyń kóbi ekzotıkalyq qus, janýarlardy ustaýmen áýestenedi. Bul áýpildekti bálkim solardyń biri bosatyp jibere salýy múmkin. Búginde janýarlardy qorǵaýmen aınalysatyn eriktiler qoǵamy kóp. Endi sondaı uıymdardyń birinen kómek kútemiz. О́ıtkeni jabaıy qusty ustap, baǵyp-qaǵý qustyń tilin túsinetindeı arnaıy bilimdi kerek etedi. Ornıtolog mamandar qolushyn sozyp qalar dep úmittenemiz, – dedi «Qurylysshy-2» páter ıeleri kooperatıviniń zańgeri Elnar Jarmaǵambetov.
Mamandardyń aıtýynsha, áýpildek aqqutandar tuqymdasyna jatady eken. Tabıǵatta sırek kezdesetin ári joıylyp bara jatqan qustar sanatyndaǵy bul qus ózen-kólderdiń jaǵasyndaǵy qalyń qamystyń ishin mekendeıdi. Tobyl jaǵalaýyna kóktemde kelip, uıa salyp, balapandap, qazannyń sońyna qaraı jyly jaqqa ushyp ketedi eken. Qostanaıdan tabylǵan áýpildektiń taǵdyry qalaı bolatynyn, qazirshe, boljaý qıyn. Biraq oblystyq orman sharýashylyǵy jáne janýarlar álemi ınspeksııasynyń mamandary kooperatıvke habarlasyp, qusty óz qamqorlyqtaryna alatyndaryn aıtypty.
Qostanaı oblysy
