Jylý máselesi kúıip tur

Oblys ortalyǵynda jylý berý máselesine baılanysty ke­zekti jıyndy jeksenbi kúni Pavlodar oblysynyń ákimi Ábil­qaıyr Sqaqov taǵy bir márte ótkizdi. Oblys basshysy jeli­ler­degi apattardyń saldaryn joıý boıynsha jumysty uıym­dastyrý deńgeıi nashar eke­nin aıtyp, kásiporyn daıyn­dy­ǵyn qatań synǵa aldy. О́z kezeginde «Pavlodar jylý je­li­leri» JShS basshylyǵy buǵan tótenshe jaǵdaılardy joıý úshin ju­mysshylar jetispeıdi degen ýáj aıtty.

– Pavlodar boıynsha jylý­dy qalypty iske qosý úshin 20 kún qajet, búgin jylytý maý­­symy bastalǵannan beri 12-shi kún ótti, – dep túsindirdi «Pav­lo­darenergo» AQ basshysy Oleg Perfılov. Sonymen qatar biz jóndeý jumystaryn mamyr aıynda karantınge baılanysty keıinge shegerip, jospardan bir aı keıin bastaǵanymyzdy umyt­pa­ýymyz kerek.

Biraq bul ýáj ákimniń kóńilin kónshitpedi. Ol kásiporynda aıaq­as­ty týyndaýy yqtımal ár­t­úr­­li táýekelderdi josparlaý men boljaýdyń joqtyǵyn atap ótti. Iаǵnı monopolıstiń dá­lel­deri negizsiz. Sol sebepti Á.Sqaqov jylý berýshi uıym jóndeý býyndarynyń sanyn kóbeıtip, táýlik boıy jumys isteý  rejimine kóshýin talap etti. Ol óziniń birinshi orynbasary Suńǵat Esimhanovqa beıindi qyz­mettermen birlesip, jylý je­lileriniń tozýy turǵysynan problemalyq aımaqtardy anyq­t­­aý­dy jáne olarǵa turaqty baqy­laý ornatýdy tapsyrdy.

Málimetke súıensek, Pavlodar qalasynda qazirgi kezde 1 145 kópqabatty turǵyn úıdiń 90%-y jylý júıesine qosylǵan, 1 165-i (90%-dan astamy) ystyq sýmen qamtamasyz etilgen. Qazir 112 úı jylýsyz, 69 úı ystyq sýsyz qalyp otyr. Jylý bolmaýynyń sebepteriniń jartysy jylý jelilerindegi apattarǵa baılanysty bolyp otyr. 36 úı PIK-tiń daıyn bolmaýyna baılanysty jylýsyz qalǵan.

Taǵy 20 úı «Dachnyı» shaǵyn aýdanynda ornalasqan. Shahar basshysy Erjan Imanslıamnyń esebi boıynsha, munda barlyq jóndeý jumystary aıaqtalǵan, qazir júıeni sýmen toltyrý júrip jatyr. «Dachnyı» shaǵyn aýdanynyń tur­ǵyndary jylýǵa búgin-er­teń qosylady. Aıta ketelik, dál osy Dachnyı aýdanynyń tu­synda magıstraldyq qubyr tartý boıynsha kúrdeli jumystar júrgizilýde. Atalǵan aýmaqta qazý jumystarynyń ótkizilýine baılanysty «Dachnyı», oǵan irgeles Ýsolka shaǵyn aýdandary 15 mamyrdan bastap ystyq sýsyz kún keship keledi.

Oblys ákimi qala turǵyn­da­ry­nan, ásirese «Dachnyı» shaǵyn aýdanynyń turǵyndarynan kóp­te­gen shaǵym túsetinin atap ótti. Á.Sqaqov qala basshysyna je­del túrde osy shaǵyn aýdannyń tur­ǵyndarymen kezdesip, olardyń úı­leri boıynsha aǵymdaǵy jaǵdaı týraly habarlaýdy tapsyrdy.

Aıta ketelik, jýyrda Pavlo­dar qalasynyń Sol­tús­tik jylý jeli­leri aýdanynda, N.Nazar­baev dańǵylynyń bo­ıyndaǵy avto­kólik kópiri aýma­ǵynda qo­sym­sha jańa nasos stan­sasy qol­da­nysqa berilmek. Jańa stansa – «Pavlodar jylý jeli­le­ri» JShS 2030 jylǵa deıin qalany da­my­týdyń bas josparyna sáıkes qala ákimdigimen birlesip iske asyrǵan jobasy. Atalǵan nasos stansasy sura­ny­sy ósip otyrǵan jylýmen qam­tý­dyń senimdiligine, Pavlodar qa­la­synyń ortalyq aýmaǵynda gıdra­v­lıkalyq rejimdi jaq­sar­týǵa kómegin tıgizedi. Atap aıtqanda, Lomov kóshesine deıingi aýmaqty, sondaı-aq Saryarqa shaǵyn aýdanyna deıin jylýmen qam­týdy kúsheıtedi. Ortalyq jy­lý júıesine qosylǵan keı­bir aımaqtarda oryn alǵan olqylyqtardy joıatyn bolady. PNS 2/3 qurylysyn iske asyrý jumystary 1 jyl boıy júrgizildi. Bul maqsatta qala bıýdjetinen 960 mln teńge bólindi. Búginde barlyq qurylys jumystary aıaqtalǵan, qurylǵyny iske qosý, jumysyn retteý prosesteri júzege asyrylýda. Mamandar qural-jabdyqty ártúrli qysymda jumys isteý qa­bi­letin synaqtan ótkizip, tek­se­rý­de.

Sondaı-aq Pavlodar qalalyq qurylys bóliminiń tapsyrysy boıynsha Maıakovskıı-Lomov kósheleriniń aýmaǵynda №5 jylý magıstraliniń qaıta qalpyna keltirý jumystary júrgizilýde. Atalǵan nysandy rekonstrýksııalaý nátıjesinde Zaton aýmaǵynda salynyp jatqan 350 oqýshyǵa arnalǵan jańa mektep sapaly jylý qýatymen qamtamasyz eti­le­tin bolady.

Sóz aıaǵynda aıta ketelik, pandemııa qaýpine baılanys­ty óńirlerge bıyl jylýǵa qosý jumystaryn jedeldetý tapsy­ryl­ǵan bolatyn. Turǵyndar sýyq­ta jaýrap, onyń sońy jiti res­pıratorlyq vırýstyń, tu­maý­dyń, taǵy da basqa maýsymdyq aýrýlardyń kúsheıýine sebep bolmaýy kerek. Bul rette, Pavlodar óńirine jumysty odan ári qatań baqylaýda ustaý qajet.

Nurbol JAIYQBAEV

PAVLODAR