Keshe Qazaqstan Respýblıkasynyń Prezıdenti Nursultan Nazarbaev Shveısarııa Konfederasııasy Kantondar keńesiniń prezıdenti Fılıppo Lombardıdi qabyldady, dep habarlady Qazaqstan Prezıdentiniń baspasóz qyzmeti.
Keshe Qazaqstan Respýblıkasynyń Prezıdenti Nursultan Nazarbaev Shveısarııa Konfederasııasy Kantondar keńesiniń prezıdenti Fılıppo Lombardıdi qabyldady, dep habarlady Qazaqstan Prezıdentiniń baspasóz qyzmeti.
Kezdesý barysynda ekijaqty parlamentaralyq qarym-qatynastar, sondaı-aq, jańa tehnologııa, energetıka salalaryndaǵy yntymaqtastyq pen halyqaralyq uıymdar aıasyndaǵy ózara yqpaldastyq jaıy talqylandy.
Memleket basshysy bul F.Lombardıdiń Qazaqstanǵa alǵashqy sapary ekenin, oǵan eleýli mańyz berilip otyrǵanyn jetkizdi.
– Biz budan jıyrma jyl buryn Shveısarııamen dıplomatııalyq qarym-qatynas ornattyq. Elderimiz arasynda jaqsy saýda-ekonomıkalyq yntymaqtastyq ornyqqan, ózara ınvestısııa artýda. Bizde ekijaqty ózara yqpaldastyqtyń jaǵymdy qarqynyn jalǵastyrýǵa degen múddelilik bar, – dedi Nursultan Nazarbaev.
Sondaı-aq, Qazaqstan Prezıdenti memleketaralyq qarym-qatynastardy nyǵaıtýǵa qomaqty úles qosatyn parlamentaralyq baılanystardyń mańyzdylyǵyn atap kórsetti.
Shveısarııanyń Kantondar keńesi prezıdenti tek saıası jáne saýda-ekonomıkalyq ózara yqpaldastyqty ǵana damytyp qoımaı, ózge de salalardaǵy yntymaqtastyqty jandandyrýdyń mańyzdy ekenine toqtaldy.
– Biz basty taqyryby bolashaqtyń energııasy bolatyn EKSPO-2017 halyqaralyq kórmesin ótkizýge qoldaý kórsetetinimizdi jáne Qazaqstannyń barlyq saladaǵy, sonyń ishinde ekonomıkadaǵy, óńirde turaqtylyq pen beıbitshilikti qoldaýdaǵy jetistikterine degen iltıpatymyzdy bildirgimiz keledi. Buǵan qosa, Qazaqstan 2010 jyly EQYU-ǵa tabysty tóraǵalyq etti, al Shveısarııa bul uıym jetekshiligin 2014 jyly qolǵa alady, sondyqtan biz úshin Qazaqstannyń tájirıbesi paıdaly bolmaq, – dedi F.Lombardı.
Sýretti túsirgender
S.BONDARENKO, B.OTARBAEV.
