Áńgime barysynda taraptar halyqaralyq kún tártibindegi ózekti máselelerdi jáne Qazaqstan men Ispanııa arasyndaǵy strategııalyq seriktestik negizinde sharttyq-quqyqtyq bazany odan ári keńeıtý keleshegin qosa alǵanda ekijaqty yntymaqtastyq máselelerin talqylady.
Jahandyq máseleler boıynsha pikir almasý sheńberinde taraptar Qazaqstan men Ispanııanyń BUU-nyń qazirgi kezeńdegi qyzmetine qatysty negizgi ustanymdaryna bólek toqtaldy. Qazaqstan Prezıdenti Qasym-Jomart Toqaevtyń jáne Ispanııa Premer-mınıstri Pedro Sanchestiń BUU Bas Assambleıasynyń 75- sessııasynyń jalpy saıası debattarynda sóılegen sózderiniń negizgi baǵyttaryn egjeı-tegjeıli talqylady. Taraptar Qazaqstan men Ispanııanyń ózekti máseleler boıynsha ustanymdarynyń uqsastyǵyn qanaǵattanýshylyqpen atap ótti.
Sonymen qatar K. Jıgalov suhbattasyn Prezıdenttiń «Jańa jaǵdaıdaǵy Qazaqstan: Is-qımyl kezeńi» Joldaýynyń negizgi baǵyttarymen tanystyrdy. Ispan tarapy buǵan deıin atalǵan qujatpen tanysqanyn jáne onyń ekonomıkalyq ósý men halyqtyń ál-aýqatyn jaqsartýǵa baǵyttalǵan tutastyǵy men praktıkalyq sıpatyna nazar aýdarǵanyn aıtty.
Ekijaqty kún tártibin talqylaý barysynda qazirgi jaǵdaıdyń kúrdeliligine qaramastan, taraptar ekijaqty saıası, saýda-ekonomıkalyq yntymaqtastyqty tıisti deńgeıde jalǵastyryp kele jatqandyǵy jáne joǵary deńgeıdegi saparlardy uıymdastyrý boıynsha birlesken jumysty jalǵastyrýǵa daıyn ekendigi erekshe atap ótildi.
Taraptar áskerı-tehnıkalyq, taý-ken, kólik jáne aýyl sharýashylyq ónerkásipteri, logıstıka jáne taǵy basqa da salalardaǵy yntymaqtastyqtyń belsendiligi jáne pysyqtalyp jatqan jobalardyń mazmundylyǵy atap ótti.
Mádenı-gýmanıtarlyq saladaǵy ekijaqty yntymaqtastyqtyń jemisti damyp kelýine nazarǵa ala otyryp, Abaı Qunanbaıulynyń 175 jyldyǵyn merekeleýdi qosa alǵanda túrli is-sharalar ótkizýdiń oń dınamıkasyn qanaǵattanýshylyqpen atap ótti. Osy oraıda Elshi suhbattasyna ıspan tiline aýdarylǵan «Qara sóz» ben óleńder engen «Abaı» kitabyn syıǵa tartty.
