Jýyrda bıologııa ǵylymdarynyń kandıdaty, qaýymdastyrylǵan professor Vıktor Kamkın stýdenttermen birge oraldyq mııany egý tájirıbesin bastady. Kóktemde synaqtyń ekinshi kezeńi bastalady.
Ǵalymdardyń aıtýynsha, oblysta mııa nemese ózge dárilik ósimdikterdi daıyndaý zańsyz júrgiziledi. Stıhııalyq daıyndaý barysynda ósimdikterdiń erekshelikteri eskerilmeı, tabıǵı popýlıasııa óz resýrstaryn qalypqa keltirýge úlgermeıdi. Bul joba ósimdikterdiń tabıǵı erekshelikterin saqtap, ekologııalyq ósirýdi uıymdastyrýǵa múmkindik bermek.
– Plantasııalyq ósirýge oraldyq mııa jaramdy. Qytaılyq medısınada mııa – jenshenmen para-par dárilik ósimdik. Ǵalamtorda tamyrdyń bir kılosy 1600 teńgeden satylyp júr. Biz bul úrdisti zańdastyrǵymyz keledi, – deıdi sarapshy.
Ǵalymdar dárilik ósimdikterdi zertteýmen 2007 jyldan beri aınalysyp keledi. Ertis ózeniniń jaıylymy, Baıanaýyl ulttyq parki men Ertis ormany rezervatynyń aýmaǵy tyńǵylyqty zertteldi. Búginde aımaqta jabaıy túrde 194 dárilik ósimdik túri ósetini belgili boldy. Ony ósirý týrasynda júrgizilgen synaq nátıjesinde ósimdikterdi basqa jaǵdaıǵa da beıimdeýge bolady degen qorytyndy jasaldy.
– Qazaqstandaǵy farmasevtıkalyq salanyń qazirgi jaǵdaıy syn kótermeıdi. Sebebi elimiz qajettiligimizdiń tek 15%-yn jabady. Al memlekettiń ulttyq qaýipsizdigin qamtamasyz etýde preparattardyń úlesi kem degende 30 %-dy quraýy kerek, – deıdi V.Kamkın.
Qazirgi ýaqytta Qazaqstandaǵy farmkompanııalar dári daıyndaýda shıkizatty alys-jaqyn shetelderden tasymaldaıdy (RF, Altaı óńiri, QHDR).
Qazaqstannyń ár oblysynda dárilik ósimdikter ósedi. Degenmen, dárilik ósimdik sharýashylyǵynyń áleýeti birinshi kezekte aımaqtyń ekologııalyq tazalyǵyna baılanysty anyqtalady. Al ekinshi kezekte, bıologııalyq san alýandylyǵy men landshafty deńgeıleri qarastyrylady. Bul turǵyda oblystyń – Jelezın aýdanynyń áleýeti zor.
Pavlodar oblysy
