«Qazmedıa» ortalyǵynyń jýrnalıster aldyna shyqqan kezekti qonaǵy Májilistiń Qarjy jáne bıýdjet komıtetiniń tóraıymy Gúljan Qaraǵusova boldy. Ol da Elbasy N.Nazarbaevtyń Úkimettiń keńeıtilgen otyrysynda aıtqan syn-eskertpelerine óziniń pikirlerin bildirdi.
«Qazmedıa» ortalyǵynyń jýrnalıster aldyna shyqqan kezekti qonaǵy Májilistiń Qarjy jáne bıýdjet komıtetiniń tóraıymy Gúljan Qaraǵusova boldy. Ol da Elbasy N.Nazarbaevtyń Úkimettiń keńeıtilgen otyrysynda aıtqan syn-eskertpelerine óziniń pikirlerin bildirdi.
Biz jýyrda ǵana 2013-2015 jyldardaǵy bıýdjettiń anyqtalýyn qaradyq. Bıýdjetke engizilgen 150 mlrd. teńgeniń ıgerilmeıtindigi anyqtaldy. Olar negizinen «Báıterek», «Astanany damytý», EKSPO-2017 jáne «Beıneý temir joly» sııaqty tórt baǵyttaǵy baǵdarlamalar boıynsha uzyn sany 11 bıýdjet ákimgerleri suratqan qarajat. Bıýdjet ákimgerleriniń osyǵan baılanysty túsindirmelerin biz komıtette tyńdadyq, alaıda, olardyń aıtqan áńgimelerine biz qanaǵattanǵan joqpyz. Jyl boıy bıýdjet birneshe ret anyqtalady, sonyń ózinde jyl qorytyndysy boıynsha Úkimet 30-40 mlrd. teńgeniń ıgerilmeı qalatyndyǵy týraly aıtady. Osynyń ózi bıýdjetti qadaǵalaý tártibiniń tómendigin kórsetedi. Elbasy ony oryndy synady. Ústimizdegi jyldyń shilde aıynda Prezıdent jańa bıýdjet saıasatyn jasaý týraly óziniń arnaýly Jarlyǵymen tapsyrma berdi. Endi bıýdjet shyǵyndary sońǵy nátıjemen baılanystyrylatyndyǵy týraly bıýdjet týraly zańǵa jańa ózgerister engiziletin shyǵar. Biz qazir sony kútip otyrmyz, dedi G.Qaraǵusova. Men mynany eske salar edim, dedi sheshen, árbir bıýdjet ákimgerleri de, basqalar da bıýdjet qarajatyn memlekettiń aqshasy dep túsinedi. Al memlekettiki degen dúnıeniń bári árbir qazaqstandyq azamattyki ekenin umytyp ketedi. Sondyqtan da «memlekettiki» degen bireýdiki emes, ózimizdiń qarajatymyz ekenin umytpaýymyz kerek.
G.Qaraǵusova kelesi kezekte suraqtarǵa jaýap berdi. Alǵashqysy bıýdjettiń osyndaı olqylyqtarmen oryndalatyndyqtaryn qalaı joıýǵa bolady, álde bul qazirgi Úkimettiń shalalyǵynan ba? degen suraq boldy. Buǵan G.Qaraǵusova bul Úkimettiń shalalyǵy emes, bıýdjet týraly zańnamanyń shalalyǵynan ekenin aıtty. Bıýdjet týraly zańnamanyń talaby boıynsha Úkimet óziniń qaýlysymen bıýdjet týraly ózderiniń usynystaryn, qorytyndysyn beretin qyzmetterge joldaıdy. Osylardyń arasynda artyqtary da joq emes. Sondyqtan olardy qysqartý kerek dep oılaımyn. Jańa bıýdjettik saıasat týraly tapsyrmada da osyndaı usynystar bar, dedi depýtat.
Kelesi suraq G.Qaraǵusovanyń Keden odaǵy týraly aıtqan syn-pikirlerine qatysty boldy. «24 KZ» arnasynyń tilshisi Keden odaǵyna enýge qol qoımas buryn onyń tıimdiligi túbegeıli zerttelgen joq degen pikirler bar, siz osyǵan kelisesiz be degen suraq qoıdy. Oǵan G.Qaraǵusova qazirgi álem tegisimen ıntegrasııalyq qurylymdar quryp jatqanda biz de ol úrdisten qalmaýymyz kerek qoı degenge saıatyn ekiushty jaýap berdi. Sondyqtan men Keden odaǵyn qoldaımyn. Biraq keıbir sheshilmegen máseleler bary ras, dedi ol.
Jaqsybaı SAMRAT,
«Egemen Qazaqstan».
