Qazaqstan Parlamenti Májilisiniń Tóraǵasy Nurlan Nyǵmatýlın men Shveısarııa Konfederasııasy Parlamenti Kantondar keńesiniń prezıdenti Fılıppo Lombardı eki el arasyndaǵy parlamentaralyq yntymaqtastyqty damytýdyń ózekti máselelerin talqylady.
Qazaqstan Parlamenti Májilisiniń Tóraǵasy Nurlan Nyǵmatýlın men Shveısarııa Konfederasııasy Parlamenti Kantondar keńesiniń prezıdenti Fılıppo Lombardı eki el arasyndaǵy parlamentaralyq yntymaqtastyqty damytýdyń ózekti máselelerin talqylady.
Atap aıtatyn bolsaq, halyqaralyq parlamenttik uıymdar aıasynda qos el parlamentteriniń ózara is-qımylyn nyǵaıtý, zańnamalyq salada tájirıbe almasý, sondaı-aq, yntymaqtastyq jónindegi toptar arasyndaǵy baılanystardy yntalandyrý máseleleri sóz boldy.
Nurlan Nyǵmatýlın Májilis jumysynyń basym baǵyttaryna toqtala kelip, Qazaqstan Prezıdenti Nursultan Nazarbaevtyń «Qazaqstan-2050» Strategııasyn zańnamalyq qamtamasyz etý jolynda atqarylyp jatqan isterge basa nazar aýdardy. Qazaqstan úshin atalǵan memlekettiń ındýstrııalyq-ınnovasııalyq damý salasyndaǵy tájirıbesi erekshe qyzyǵýshylyq týdyrady.
F.Lombardı óz kezeginde halyqtar arasyndaǵy ózara yntymaqtastyqty jáne jalpy beıbitshilikti nyǵaıtýǵa yqpal etetindikten, eki eldiń parlamentaralyq baılanysynyń mańyzy zor ekendigin atap ótti.
Taraptar barlyq sala boıynsha Qazaqstan-Shveısarııa ózara qarym-qatynasynyń deńgeıin joǵary baǵalaı kelip, osy yqpaldastyqty odan ári nyǵaıtý eki memleket basshylarynyń da etene baılanysyna ózindik áser etetinin tilge tıek etti.
Májilis Tóraǵasynyń atap ótkenindeı, Shveısarııa sońǵy 5 jyl kóleminde kóshbasshylyq deńgeıden túspeı, ınnovasııanyń álemdik ortalyǵyna aınalýda. Bizde, ásirese, Qazaqstan ekonomıkasyn jańǵyrtý baǵdarlamasy aıasynda ózara tıimdi yntymaqtastyqty nyǵaıtýdyń keremet múmkindigi bar, dedi N. Nyǵmatýlın.
Sondaı-aq, saýda-ekonomıkalyq áriptestik, Ortalyq Azııa aımaǵyndaǵy qaýipsizdik, sonyń ishinde, Aýǵanstan máseleleri de kezdesýshiler nazarynan tys qalmady.
Júzdesý sońynda Májilis Spıkeri 2014 jyly «Barshanyń múddesi jolynda qaýipsizdik qaýymdastyǵyn qurý» uranymen ótetin Shveısarııanyń EQYU tóraǵalyǵy atalǵan aımaqta turaqtylyq pen qaýipsizdikti kúsheıtýge aıtarlyqtaı úles qosatynyna senim bildirdi.
