Keshe Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Astanaǵa resmı saparmen kelgen Shveısarııa Konfederasııasy Kantondar keńesiniń prezıdenti Fılıppo Lombardımen kezdesti.
Keshe Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Astanaǵa resmı saparmen kelgen Shveısarııa Konfederasııasy Kantondar keńesiniń prezıdenti Fılıppo Lombardımen kezdesti.
Q.Toqaev Qazaqstannyń Eýropadaǵy mańyzdy saıası jáne ekonomıkalyq áriptesi retinde Shveısarııanyń rólin atap ótti. Eki el de qazirgi zamandaǵy jahandyq máselelerge kózqarastary uqsas jáne kóptarapty qurylymdar aıasynda ózara tabysty is-qımyldy júzege asyryp keledi.
Kezdesý barysynda taraptar parlamentaralyq ózara yntymaq máselelerine erekshe nazar aýdardy. Qarasha aıynyń sońynda Bernde «Shveısarııa-Qazaqstan» parlamentaralyq tobynyń alǵashqy otyrysy bolady. Q.Toqaevtyń pikirinshe, «jasyl ekonomıka», jańartylatyn energetıka, sybaılas jemqorlyqpen, transulttyq qylmystarmen kúres, ekstremızm men terrorızmge qarsy is-qımyl máseleleri boıynsha zań shyǵarýda toptyń qyzmeti tájirıbe almasýǵa yqpal etetin bolady.
Eki eldiń ekonomıkalyq yntymaqtastyǵyn nyǵaıtýda, júzdesýshilerdiń pikirinshe, Qazaqstan-Shveısarııa Iskerler keńesi men Qazaqstan-Shveısarııa Saýda-ekonomıkalyq yntymaqtastyq jónindegi úkimetaralyq komıssııasynyń mańyzdy orny bar. 2012 jyly Qazaqstan men Shveısarııa arasyndaǵy saýda kólemi 5,2 mıllıard dollardy qurady.
Sol kúni F.Lombardı Qazaqstan Parlamenti Senatynyń depýtattary aldynda sóz sóıledi. Mártebeli meıman Astananyń damý qarqyny jónindegi áserlerimen bólise otyryp, ony «Dala Manhetteni» dep atady. Astanalardy kóshirý tarıhyndaǵy osyndaı saıası, áleýmettik jáne ekonomıkalyq ornyqty ári zor tabystardy qamtamasyz etýge qol jetkizgeni neken-saıaq... Men osyndaı tamasha jobany júzege asyrý úshin dana ári saıası sheshim qabyldaý qajet bolǵanyn ańǵaryp otyrmyn. Búgingi Astana sizderdiń elderińizdiń keıingi jıyrma jyldaǵy táýelsiz memleket retinde jedel damýyn pash etedi, dedi Kantondar keńesiniń prezıdenti.
F.Lombardı Qazaqstannyń halyqaralyq arenadaǵy róli arta túskenin atap ótip, eldiń aımaqtyq jáne álemdik deńgeıde qýatty ári senimdi áriptes ekenin jetkizdi. Elderdiń arasyna kópir salýdaǵy Astana óziniń áleýetimen Shveısarııanyń halyqaralyq arenadaǵy rólin kórsetetin Jenevamen uqsastyǵy bar, dedi ol.
EQYU-nyń 2014 jylǵy tóraǵasy retinde Shveısarııa osy uıymǵa tóraǵalyq etýde qazaqstandyq tájirıbeni paıdalanýǵa nıettenip otyr. Sonymen qatar, meıman Astanada EKSPO-2017 kórmesiniń ótýine qoldaý bildirdi. «Bolashaqtyń energııasy» taqyrybyn tańdaı otyryp, sizderdiń elderińiz ekonomıkalyq turǵyda aldyńǵy qatardaǵy elge aınalý jolyndaǵy evolıýsııanyń quramdas bóligi bolyp tabylatyn qaterler men jaýapkershilikti uǵynatynyn kórsetýde, dep atap ótti F.Lombardı.
Kantondar keńesiniń prezıdenti Qazaqstan-Shveısarııa parlamentaralyq yntymaqtastyǵyn odan ári ilgeriletý jaıynda aıta kelip, ol ortaq múdde bolyp tabylatyn mindetterdi sheshýge múmkindik beretinin atap ótti. Ol, sondaı-aq, bıyl qurylǵan Qazaqstan-Shveısarııa Iskerler keńesi ózara ınvestısııalardyń arta túsýine yqpal etetinine senim bildirdi.
F.Lombardı BUU-nyń Jenevadaǵy Bóliminiń Bas dırektory laýazymyndaǵy tıimdi qyzmeti úshin Q.Toqaevqa rızashylyǵyn bildirdi. BUU-nyń kóptegen mańyzdy tehnıkalyq qurylymdary Jenevada ornalasqandyqtan, Nıý-Iorkten góri osy qalada kóptegen kezdesýler ótedi... Biz Toqaevqa jumystardyń bárin óte tıimdi jáne muqııat atqarǵany úshin rızamyz, dedi F.Lombardı.
Kelissóz ben kezdesýlerge qazaqstandyq senatorlar, sondaı-aq eki eldiń elshileri Muhtar Tileýberdi men Maýro Reına qatysty.
Asqar TURAPBAIULY,
«Egemen Qazaqstan».
