Aqynnyń mereıtoıyna arnalyp salynǵan 250 sharshymetrlik mýraldyń tómengi jaǵyna «Paıda oılama, ar oıla» degen qanatty sóz jazylypty.
Bul týyndynyń paıda bolýyna Sybaılas jemqorlyqqa qarsy agenttigi Batys Qazaqstan oblystyq departamenti muryndyq bolǵan. «Aqjaıyq – adaldyq alańy» jobasy aıasynda salynǵan mýraldyń qarjysyn demeýshiler «RENKO» kompanııasy men «Aıala» seriktestigi kóterse, uly oıshyldyń 9 qabatyq úımen birdeı beınesin sýretshiler Darıa men Iаkov Poleshýk 15 kún ishinde salyp shyqqan.
- Abaıdyń «Paıda oılama, ar oıla» degen qanatty sózi osy kúni de ózektiligin joımaı tur. Aýdan turǵyndaryn, sonyń ishinde jastardy tazalyqqa, adaldyqqa, parasattylyqqa shaqyratyn mundaı keremet mýral ázirshe oblysymyzda jalǵyz ǵana. Keleshekte bizdiń agenttik ózge aýdandarda da osynda kórneki quraldar ornatýdy josparlap otyr. Mýral ǵana emes, uly tulǵalarymyzdyń sýreti salynǵan bılbordtar aýdan, qala kóshelerine qoıylatyn bolady. Osylaısha tarıhı tulǵalardyń danalyq sózderi adaldyqtyń ala jibin attamaýǵa túrtki bolaryna senimdimiz, – dedi Aqsaıdaǵy mýraldyń ashylý saltanatyna arnaıy kelgen Batys Qazaqstan oblystyq sybaılas jemqorlyqqa qarsy qyzmeti basshysynyń birinshi orynbasary Nurdáýlet Samet.
Jalpy Aqsaı qalasynda Abaı Qunanbaıulynyń 175 jyldyq mereıtoıyna oraı jyl sońyna deıin 175 mádenı is-shara josparlanǵan eken. Bórli aýdanynyń ákimi Mırjan Satqanov óz sózinde aýdan turǵyndaryn uly aqyndy ulyqtaýǵa, ósıetin ómirde qoldanýǵa shaqyrdy.
Aıta keteıik, sońǵy jyldary Aqsaı qalasynyń qazaqy bet-beınesi kórkeıip keledi. Buǵan deıin qala ortalyǵyndaǵy kóp qabatty úılerge Baýyrjan Momyshuly men Batyrhan Shúkkenovtiń mýraly salynǵan bolatyn. Bul sýretter kúndiz de, túnde de alystan kóz tartyp, qalanyń kórkine kóoik qosyp tur.
Batys Qazaqstan oblysy
