Atalǵan emhana 65 myń turǵynǵa qyzmet kórsetedi. Munda 300-ge jýyq medısına qyzmetkeri jumys isteıdi. Alaıda bul emhanada koronavırýs ınfeksııasyn juqtyrǵan medısınalyq qyzmetkerlerge tólenetin ótemaqyǵa qol jetkize almaǵandar bar. Máselen, emhanada tirkeýshi bolyp jumys isteıtin kópbalaly ana Marııa Qonarova alǵashqylardyń qatarynda koronavırýs ınfeksııasyn juqtyrǵan.
– Koronavırýsqa qarsy tapsyrǵan test oń nátıje kórsetip, oǵan qosa pnevmonııa dıagnozy qoıyldy. Aýrýhanada emdelip shyqtym, – deıdi M.Qonarova. – Áriptesterimniń arasynda emdelgen soń jumysqa qaıta shyqqandary bar. Biz ótemaqy alýǵa eki ret qujat tapsyrdyq. Biraq ekeýinde de ótemaqy tólengen joq. Onyń sebebin de túsindirmeı, bas tartyldy. Nege?
Emhananyń rentgenology Azamat Ádilbekuly pandemııanyń birinshi tolqynynda dene qyzýy 390S-qa kóterilse de jumys ornyn tastap ketpegen. Ony almastyratyn ekinshi rentgenolog aýyryp, jumysqa shyqpaı qalǵan.
– Kompıýterlik tomografııa nátıjesimen pnevmonııa bolsaq ta, qyzmetimizdi atqara berýge týra keldi. KT-ǵa óz áriptesterimdi de túsirdim. Olardyń kóbinde pnevmonııa bolǵanyn dáleldeı alamyn, – deıdi Azamat Ádilbekuly.
Medbıke Baljan Tólegenovanyń da qaýipti indetpen aýyrǵanyn dáleldeıtin kompıýterlik tomografııadan alǵan anyqtamasy bar. Biraq nege ekeni belgisiz, oǵan da áli kúnge ótemaqy tólenbeı otyr. Blok-bekette jumys istep, kásibine adaldyǵynan taımaǵan medbıke Prezıdent tapsyrmasynyń oryndalmaǵanyna nalıdy.
Adal eńbegi elenbegen medısına qyzmetkerlerimen oblystyq densaýlyq saqtaý basqarmasy basshysynyń mindetin ýaqytsha atqarýshy Ashan Baıdýálıev kezdesý ótkizdi. Alaıda ol ótemaqynyń komıssııa sheshimimen ǵana tólenetinin túsindirýmen ǵana shekteldi.
– Prezıdenttiń tapsyrmasyna sáıkes, Densaýlyq saqtaý mınıstrligi men Eńbek jáne halyqty áleýmettik qorǵaý mınıstrliginiń qyzmet barysynda koronavırýs juqtyrǵan medısınalyq qyzmetkerlerge epıdemııalyq tekserý nátıjesinde ótemaqy tóleý týraly birlesken buıryǵy bar. Soǵan saı keletin dárigerlerge ótemaqy tólenedi. Qazir Atyraý oblysynda koronavırýs ınfeksııasy men vırýstyq pnevmonııa juqtyrdyq dep járdemaqy alý úshin 955 medısına qyzmetkeri qujat tapsyrdy. Olardyń qujattaryn koronavırýs indetimen kúreste qyzmet etken medısına qyzmetkerlerine ústemeaqy men ótemaqyny tóleý jónindegi komıssııasy turaqty túrde qaraýda, – deıdi Ashan Baıdýálıev. – Osy kezge deıin komıssııa 9 otyrys ótkizdi. Qujattardyń 474-i maquldanyp, 481-i keri qaıtaryldy. Biraq jaqynda atalǵan buıryqqa birqatar ózgeris engizilýine baılanysty dárigerlerdiń qujattaryn komıssııaǵa qaıta berip, qazir qaralyp jatyr.
Bul emhananyń budan ózge de túıtkili bar eken. Basqarma basshysynyń mindetin ýaqytsha atqarýshynyń aıtýynsha, №1 Atyraý qalalyq emhananyń esepshotynan 70 mln teńge urlanyp ketipti. Urynyń esepshottan iri kólemdegi qarjyny elektrondy túrde qoldy etkeni anyqtalyp otyr. Qazir quqyq qorǵaý organdary tıisti tergeý-anyqtaý jumystaryn júrgizip jatyr.
Atyraý oblysy
