Brazılııadan alynǵan dán sepkish qurylǵynyń kómegimen, masaqty daqyldardyń túsimdiligi 2 ese artqan.
Qazyǵurt aýdany, "Sharbulaq" aýyldyq okrýginde ótken semınar-keńeste jańa tehnologııalardyń paıdalanylýy jaıynda keńinen aıtyldy. Ashyq aspan astynda ótken basqosýǵa oblys ákimi О́mirzaq Shókeev, agrobıznes ókilderi, aýdan, qala ákimderi men sharýalar qatysty. Súr tanapta qaldyrmaı tikeleı sebý ádisterin álemniń damyǵan elderi, atap aıtqanda AQSh, Kanada, Brazılııa, Argentına elderiniń sharýalary keńinen paıdalanady. Sońǵy jyldary kóp elderde nóldik tehnologııany paıdalaný arqyly ósiriletin egistiktiń kólemi artyp keledi.
Aıdalmaǵan jerge daqyldardy tikeleı sebýdiń tıimdiligi elimizdiń soltústik aımaqtarynda da, ásirese shóleıtti, sý jáne jel erozııasyna ushyraǵan jerlerde dáleldengen. Semınar-keńeste oblys ákimi jańa tehnologııalarǵa mindetti túrde kóshý qajettigin atap ótti.
"О́ıtkeni myna básekelestik zamanda dástúrli tehnologııa alysqa aparmaıdy bizdi. Nóldik tehnologııany óte belsendi qolǵa alyp jatqan sharýa qojalyqtary bar. Bul jerde batyldyq kerek", dedi О́mirzaq Estaıuly.
Sondaı-aq jıynda oblystyq aýyl sharýashylyǵy basqarmasynyń basshysy Nurbek Badyraqov Qazaqstandaǵy maqtany satyp alý baǵasynyń bekitilýin jarııalady. О́ńirdegi 18 maqta óńdeıtin kásiporyn shıtti maqtanyń tonnasyn 130 myń teńgeden qabyldaýdy bastady. Irilengen agroqurylymdar úshin shıtti maqta baǵasy áli de ósedi dep kútilýde.
Túrkistan oblysy
