Otbasy isteri jónindegi basqarma nege jabyldy?

Otbasyndaǵy ozbyrlyqtyń aldyn alý úshin Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııa Túrkistan oblysynda «Otbasyndaǵy zorlyq-zombylyqsyz Qazaqstan» qanatqaqty jobasyn iske asyrýdy bastaǵan bolatyn. Joba aıasynda oblysta Otbasy isteri jónindegi basqarma jáne 15 aýdanda Áleýmettik-psıhologııalyq súıemeldeý qyzmeti qurylǵan. Biraq ákimdik óz sheshimimen oblysta bul jobany júzege asyrýdy toqtatyp, basqarmany jaýyp tastady. Sondaı-aq qanatqaqty joba boıynsha ár aýdanda turmystyq zorlyq-zombylyq qurbandary úshin «Daǵdarys oryndary» qurylady dep josparlanǵan bolatyn, bul másele de sheshimin tapqan joq. Ulttyq komıssııanyń tóraıymy Lázzat Ramazanovanyń basshylyǵymen Túrkistan oblysy ákimi janyndaǵy Áıelder isteri jáne otbasylyq-demografııalyq saıasat jónindegi oblystyq komıssııa músheleriniń jáne óńirlik úkimettik emes uıymdar ókilderiniń qatysýymen ótken onlaın-keńeste osyndaı derekter keltirildi. «Búgin biz áıelder men balalar quqyǵyn qorǵaý máselesin sheshýde barlyq quzyrly organdardyń ózara úılestirý jumysynyń qajettiligin aıtyp otyrmyz. Kópbalaly analar men zorlyq-zombylyq qurbandary memlekettik qyzmetshiler men polısııanyń artynan júgirmeýi, túrli qurylymdardan qoldaý izdemeýi tıis. Máselege jedel jaýap bere alatyn, eń bastysy aldyn alý úshin jumys júrgize alatyn biryńǵaı júıe qajet. Bul másele sheshilmese, biz osyndaı faktiler týraly tek áleýmettik jelilerden biletin bolamyz», dedi keńeste Lázzat Ramazanova.

Iá, kezinde aldyna jaqsy maqsattar qoıylǵan joba sheńberinde qurylǵan Otbasy isteri jónindegi basqarmanyń nege jabylǵany keńeste aıtylmady. Bálkim, onyń ekonomıkalyq turǵyda tıimsizdigi, quqyq qorǵaý oryndaryna degen senim de sebep bolǵan shyǵar. Al oblys ákiminiń orynbasary Sáken Qalqamanov óńirde áıelderge qatysty turmystyq zorlyq-zombylyq faktileriniń 2019 jyly 29,6%-ǵa, balalarǵa qatysty 7,4%-ǵa tómendegenin atap ótti. Qazyǵurt aýdanyndaǵy sońǵy oqıǵa áleýmettik jelilerge monıtorıng júrgizý barysynda ǵana anyqtalǵan, degenmen balalardyń anasy polısııaǵa agressıvti jubaıyna shaǵymdanǵan eken. Bul oraıda Sáken Qalqamanov: «Er adam ustalyp, qamaýda otyr, psıhologtar men áleýmettik qyzmetkerler áıelmen jáne balalarmen jumys isteýde. Sonymen qatar ýchaskelik ınspektordyń ótinish boıynsha ýaqtyly jumys júrgizbeýine sáıkes tekserý taǵaıyndaldy», dedi.

Lázzat Ramazanova qazirgi ýaqytta kópshilik aldynda mundaı faktilerdiń jarııalanýy turmystyq zorlyq-zombylyq qurbandary úshin máseleni sheshýdiń sońǵy múmkindigi jáne qoǵamda osyndaı faktilerge «nóldik tózim­dilikti» qalyptastyrýǵa múmkindik beretinin atap ótti. Qazirgi kezde Par­lament depýtattary otbasylyq-tur­mystyq zorlyq-zombylyqqa qarsy is-qımyl týraly zań jobalaryna bas­tama jasapty, olardyń negizine Ult­tyq komıssııa iske asyryp otyrǵan «Otba­syndaǵy zorlyq-zombylyqsyz Qazaqstan» jobasynyń tetikteri salyn­ǵan. Sondaı-aq onlaın-keńeste oblys­taǵy otbasylyq jáne genderlik saıasat­ty iske asyrý máseleleri, tujyrym­damada bekitilgen nysanaly ındıka­tor­larǵa qol jetkizý boıynsha nátıjeler, áıelder kásipkerligin qoldaý máseleleri qaraldy.

О́ńirde bıliktiń atqarýshy jáne ókildi organdarynda sheshim qabyldaý deńgeıindegi áıelderdiń úlesi – 22,5%. Sonymen qatar Nur Otan partııasynyń praımerızine oblys boıynsha 353 áıel qatysqan. Lázzat Ramazanova túrli salalarda eńbek etetin áıelderge, onyń ishinde praımerızge qatysqan áıelderge jan-jaqty qoldaý kórsetýdiń mańyzdylyǵyn atap ótti. Sondaı-aq osy jumystyń úılestirýshileri bolatyn óńirlik komıssııalardyń qyzmetin jandandyrý qajettiligi aıtylyp, bul oraıda birqatar naqty usynystar berildi.

Túrkistan oblysy