Qalada 12 qazandaǵy jaǵdaı boıynsha 14 454 oqıǵa tirkelgen, olardyń ishinde sımptomdary naqtylanǵany 8 685 jáne 5 769 sımptomsyz oqıǵalar. Naýqastar kórsetkishi 723,93-ke teń.
Almaty ákiminiń aıtýynsha, qalada jaǵdaı turaqty. Biraq 6 qazanda aýrýdyń birshama kóterilgeni baıqaldy.
"Sondyqtan qala turǵyndaryn sanıtarlyq-epıdemııalyq qaýipsizdiktiń qarapaıym erejelerine nemquraıdy qaramaýǵa, betperde taǵýǵa, áleýmettik qashyqtyqty saqtaýǵa, adamdar kóp jınalatyn oryndardan aýlaq bolýǵa, sanıtarlyq-gıgıenalyq erejelerdi qatań ustanýǵa shaqyramyn", dep atap ótti B. Saǵyntaev.
Qosymsha sharalardyń qatarynda − Almaty qalasynyń halyqaralyq áýejaıyndaǵy memlekettik shekarada sanıtarlyq-epıdemııalyq baqylaý kúsheıtildi. Qalanyń memlekettik sanıtarlyq dárigeriniń qaýlysyna sáıkes halyqaralyq reısterden keletin jolaýshylarda QVI-diń joq ekendigi týraly PTR anyqtamasy bolýy tıis. Olaı bolmaǵan jaǵdaıda olar saraptama nátıjeleri shyqqanǵa deıin karantınge jatqyzylady.
Ushyp ketetin jolaýshylardyń KVI-ge qatysty PTR dıagnostıkasyn alý úshin lısenzııalanǵan irikteý pýnkti ashyq. Qalaǵa PTR testileýinsiz keletin jolaýshylar úshin ýaqytsha turatyn qonaq úıler daıyn. Sonymen qatar, 26 monıtorıngtik toptar jumystaryn qaıta jandandyrdy, olardyń quramyna aýdandyq ákimdikterdiń, jergilikti polısııa qyzmetiniń qyzmetkerleri, "Atameken" UKP ókilderi jáne aýdandyq taýarlar men qyzmetterdiń sapasy men qaýipsizdigin baqylaý basqarmalarynyń mamandary endi. 8-10 qazan aralyǵynda 383 reıdtik sharalar ótkizildi, onyń barysynda 51 nysannyń tártip buzǵandyǵy anyqtaldy.
Betperde rejimin buzǵany úshin 13 jeke tulǵa QR Ákimshilik quqyqtyq Kodeksiniń 1 tarmaǵynyń 425-baby boıynsha ákimshilik jaýapkershilikke tartylyp, olarǵa jalpy somasy 541 710 teńge kóleminde aıyppul salyndy. Budan ózge, qyzmetine buryn tyıym salynǵan obektiler anyqtaldy. Olar belgilengen jumys rejimin saqtamaǵan.
"Kásipkerlerdi qalanyń memlekettik bas sanıtarlyq dárigeriniń talaptaryn buzbaýǵa shaqyramyn. Sonda ǵana biz aǵymdaǵy karantındik rejımde jumys jasaı alatyn bolamyz. Sizder turaqty tabys tabasyzdar jáne qalalyqtardy jumyspen qamtamasyz etesizder. Barlyǵy sizderge baılanysty", dedi qala ákimi B. Saǵyntaev bıznes-qoǵamdastyq ókilderine.
Búgingi kúni qoldanystaǵy karantındik shekteýler saqtalady. Eger sanıtarlyq-epıdemııalyq ahýal nasharlaıtyn bolsa, onda qosymsha shekteý sharalaryn engizý múmkindigi qarastyrylatyn bolady.
