Bul qadamnyń osy óńirdegi ekologııalyq ahýalǵa oń áserin tıgizeri sózsiz. Mysaly, osy mańnan aǵyp ótetin Soqyr ózeniniń jaı-kúıi ońalatyn boldy dep sanaıdy ekolog-mamandar.
Jańa stansanyń qýaty táýligine 700 tekshe metrge deıin sý tazalaýǵa jetedi. Kópsatyly tazartý tehnologııasynyń arqasynda zalalsyzdandyrylǵan taza sý alýǵa da bolady. Tolyǵymen avtomattandyrylǵan júıeni birneshe adam basqarady.
"ArselorMıttal Temirtaý" AQ Kómir departamentiniń bas ekology Ásel Kárimova "Saran" shahtasyndaǵy eski tazartý júıesiniń 1973 jyldan beri qoldanylyp kelgenin aıtty.
– Sol ýaqyttan beri ekologııalyq standarttar ózgerdi jáne onyń talaptary áldeqaıda qatańdana tústi. Tehnologııa qaryshtap alǵa ketti. Jańa býynnyń zamanaýı tazartý ǵımaratyn salý týraly sheshim qabyldanǵan edi. Endi bul maqsatqa da qol jetti, deıdi ol qýanyshyn jasyrmaı.
Dál osyndaı zamanaýı tazartý stansasy kelesi kezekte "ArselorMıttal Temirtaý" AQ-nyń ıelegindegi "Tentek" shahtasyna da salynatyn bolady.
