Qysqa merzimdi kásiptik oqytýǵa mamandyǵy joq, eńbek naryǵynda suranysy tómen nemese biliktiligin joǵaltqan jáne mamandyǵyn aýystyrǵysy keletin azamattar qatysa alady.
Kásiptik oqytý uzaqtyǵy 2020 jyly úsh aıǵa deıin jalǵasady. Baǵdarlamaǵa qatysýshylardy 5556 teńge kóleminde qarjylyq qoldaýmen jáne 21 787 teńge kóleminde shákirtaqymen qamtamasyz etedi.
Kásiptik bilim berý kýrstary eńbek naryǵynda suranysqa ıe mamandyqtar boıynsha uıymdastyrylady. Al kadrlarǵa degen qajettilik jumys berýshilerdiń ótinimderimen anyqtalady. Bıyl suranysqa ıe segiz mamandyq: aspaz, kondıter, tiginshi, pishýshi, shashtaraz, kassır-baqylaýshy, naýbaıshy, tárbıeshiniń kómekshisi.
"Qysqa merzimdi kásiptik kýrstarǵa qatysyp, tegin oqý úshin azamattar turǵylyqty jeri boıynsha Halyqty jumyspen qamtý ortalyǵynda jumyssyz retinde tirkelýi tıis. Jeke kýálik, oqý ornyn bitirgeni týraly qujat (orta bilim týraly attestat nemese joǵary bilim týraly dıplom) qajet. Elordalyqtar Beıbitshilik, 25 úı, «О́rken» IO ornalasqan “Nur-Sultan qalasy ákimdiginiń halyqty jumyspen qamtý ortalyǵyna” júginýi kerek", - dep atap ótti Jumyspen qamtý ortalyǵynda.
