Oblys ákiminiń orynbasary Erjan Ábilhanovtyń pikirine súıensek, turǵyndarǵa jedel ári sapaly qyzmet kórsetý arqyly sybaılas jemqorlyqqa jol bermeý kózdelip otyr. Osy oraıda aýdan turǵyndarynyń bir ortalyqtaǵy memlekettik organdardyń ókilderinen quqyqtyq jáne áleýmettik kómek alýyna qolaıly jaǵdaı jasaldy.
"Prezıdent "Halyq úninen qulaq asatyn memleket» tujyrymdamasyn usyndy. Osyǵan oraı óńirde "Ashyq ákimdik" jobasy qolǵa alyndy. Ashyq formattaǵy keńsede aýyl sharýashylyǵy, qurylys jáne basqa salalar boıynsha memlekettik qyzmetter kórsetiledi. Bizdiń maqsatymyz – memlekettik qyzmetterdi bir ortalyqqa shoǵyrlandyrý.
Munda "О́zine-ózi qyzmet kórsetý buryshy" jasaqtalyp, ǵalamtor jelisimen qamtyldy. Derbes kompıýterdi qoldaný arqyly ár turǵyn ózine qajetti qyzmetti alady. Arnaıy kútý zaly, balalardyń oıyn alańy jasaqtalyp otyr, dedi oblys ákiminiń orynbasary Erjan Ábilhanov.
QR Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń mindetin atqarýshy Qanat Qojahmetov bul keńseniń tıimdi tustaryna toqtaldy.
"Memleket basshysy bıylǵy Joldaýynda eki arada adam emes, qaǵazdyń júgirýi qajettigin alǵa tartty. Ashyqtyq, adaldyq, parasattylyq – ádildiktiń basty qaǵıdalary. Sol sebepten, osyndaı formattaǵy "Ashyq ákimdik" keńsesi sybaılas jemqorlyqqa qarsy saıasatqa sáıkes keledi", dedi ol.
Atalǵan departament basshysynyń birinshi orynbasary Aıdos Mamyttyń aıtýynsha, "Ashyq ákimdik" keńsesi – turǵyndar úshin qajetti aqparattar beretin, memlekettik qyzmet kórsetetin alań.
"Maqsatymyz – memlekettik qyzmetker men qarapaıym halyqtyń arasynda tikeleı dıalog ornatý. Muny "Halyq únine qulaq asatyn memleket" qurý konsepsııasynyń negizgi qaǵıdattarynyń biri deýge bolady. Turǵyndar osy keńseden memlekettik qyzmetterge baǵa bere alady" dedi Aıdos Mamyt.
