Bul kásiporyn Petropavlda ǵana emes aýylsharýashylyǵy shıkizatyn óńdeıtin respýblıkadaǵy asa iri kásiporyndardyń biri. Kompanııanyń Petropavlda eki zaýyty bar. 2004 jyly ashylǵan zaýytta qazir sary maı, pasterlengen sút, aıran, qatyq jáne t.b. ónimder shyǵarady. Zaýyt jylyna 88 myń tonna sút óńdeıdi. 2018–2020 jyldarda táýliktik qýatyn 60 tonnadan 450 tonnaǵa deıin jetkizýdi kózdegen jańartý sharalary júrgizildi. Keshe Qumar Irgebaıuly osy zaýytta boldy.
Bıyl oblys 600 myń tonna sút óndirýdi josparlap otyr. Oǵan qol jetkizýge qajetti resýrstar bar. Qazir oblysta sút óńdeý zaýyttary shıkizatpen 91% qamtamasyz etilgen. Sút oblystaǵy 80 sút kesheninen alynady. Keshenderdiń 18-i osy zamanǵa saı jabdyqtalǵan. Sońǵy eki jylda osyndaı 7 keshen salynsa, bıyl taǵy 12 fermanyń qurylysy jalǵasýda. Sóıtip, sút óndirisi taǵy 30 myń tonnaǵa deıin óspek. Sóıtip, sút zaýyttaryn shıkizatpen 94 % qamtamasyz etýge qol jetkizý kózdelgen.
Kásiporyn jeltoqsan aıynda jańa jelini iske qosady. Onyń táýliktik qýattylyǵy 32 myń tonna. Quıylǵan ınvestısııa kólemi 4,8 mlrd.teńge. Jańa jeli qosymsha 85 jumys ornyn ashady. Sóıtip, zaýyttyń jyldyq qýattylyǵy 88 myńnan 120 myń tonnaǵa deıin artpaq.
Qazir «Maslodel» zaýyty sút pen maıly daqyldardan 70 túrli ónim túrin shyǵarady. Al qosymsha jeliniń arqasynda ol ónim túrin taǵy da segizge arttyratyn bolady. Oblys ákimi Q.Aqsaqalov: «Qazir biz oblysta súttiń 46% qaıta óńdeımiz. Jańa jeliniń arqasynda bul kórsetkish 50% jetedi. Búgingi tańda oblys sary irimshikpen ózin 31 % qamtamasyz etedi. Qazir jylyna 600 tonna óndiremiz. Jyldyq suranys – 1700 tonna. Bul defısıtti biz «Molochnyı Soıýz» zaýytynyń jańa jelisi iske qosylǵan kezde jabamyz. Jańa jeli jylyna 2500 myń tonna irimshik túrlerin shyǵarýǵa múmkindik bermek. О́ńir naryǵy irimshikpen 100% qamtamasyz etiledi. Osynyń arqasynda 2021 jyldyń qorytyndysy boıynsha sútti qaıta óńdeý kólemi 50-den 55% deıin ósedi», dedi.
