Aıtyp ótý kerek, eldegi pandemııalyq ahýalǵa baılanysty 16-naýryz kúni Petropavl qalasyna jetken estafeta toqtatylyp, Jaýyngerlik Tý kóshirmesi Ulttyq ulannyń 6637 áskerı bóliminiń mýzeıine ýaqytsha tabystalǵan bolatyn.
Estafeta aıasynda uıymdastyrýshylar Elordada turatyn UOS ardagerleri – Ábdirahman Safarov pen Pavel Sergeenkonyń úıine bardy.
Ulandyqtar qart maıdangerlerge kútpegen tosyn syı jasady. Ardagerler turatyn úıdiń aýlasynda kishigirim parad ótkizilip, olar úshin Jaýyngerlik Tý kóshirmesi ákelindi. Al, áskerı orkestr ónerpazdary soǵys jyldaryndaǵy ánderdi oryndady.
Áskerı qyzmetshiler ardagerlerge Ishki ister mınıstri polısııa general-leıtenanty Erlan Turǵymbaevtyń jáne Ulttyq ulan Bas qolbasshysy general-leıtenant Rýslan Jaqsylyqovtyń atynan alǵys hattar tabys etti. 28 panfılovshy beınesindegi paradtyq top jeńimpazdar úshin saltanatty marshyn pash etti.
Atalmysh estafeta aǵymdaǵy jyldyń 5-aqpanynda Qazaqstan Respýblıkasy Ishki ister mınıstri polısııa general-leıtenanty E.Z.Turǵymbaevtyń sheshimimen Ulttyq ulanda bastaý alǵan bolatyn.
Atalǵan estafetaǵa Polısııa, Tótenshe jaǵdaılar, Qylmystyq-atqarý júıesi departamentteri, Ulttyq ulannyń óńirlik qolbasshylyqtary, áskerı bólimderi men bólinisteri, IIO men UU ardagerler uıymy, sondaı-aq orta mektep oqýshylary men áskerı-patrıottyq klýbtardyń tárbıelenýshileri, stýdent jastar, quqyqtyq tártip áskeriniń áskerı bólimderi ornalasqan qalalardaǵy jergilikti qoǵamdyq uıymdardyń ókilderi qatysty.
Estafeta bastalǵaly panfılovshylar dıvızııasy Jaýyngerlik Týynyń kóshirmesi Almaty, Qyzylorda, Batys Qazaqstan, Soltústik Qazaqstan oblystarynyń 16 eldimekeninde boldy.
Estafeta barysynda keshendi is-sharalar, atap aıtsaq soǵys jáne eńbek ardagerlerimen kezdesýler, UOS ardagerleri turatyn meken-jaılarda shaǵyn paradtar, jas óskinshektermen erlik sabaqtary, murajaılyq kórmeler ótkizildi. Ulttyq ulannyń áskerı-úrmeli orkestrleri eldimekender men áskerdiń jekelengen bólinisterinde konsertter qoıdy.
Taǵzym estafetasynyń jabylý saltanaty 14 qazan kúni saǵat 11.00-de Úrker shaǵynaýdanynda (Ilınka kenti) ornalasqan 5573 áskerı bóliminiń alańynda 8-gvardııalyq Panfılovshylar dıvızııasynyń Jaýyngerlik Týynyń kóshirmesin – I.V.Panfılovtyń nemeresi Alýa Baıqadamovaǵa saltanatty tabystaý sharasymen aıaqtalatyn bolady.
Shara bastalǵanǵa deıin bas shahardaǵy Panfılovshylar Alleıasyna gúl shoqtaryn qoıý rásimi josparlanyp otyr.
