Bul kezeńde uıymdastyrýshylar Shymkent qalasy men 14 oblystaǵy tótenshe jaǵdaı kezinde halyqqa kómek kórsetetin, volonterler qozǵalysyn damytýmen aınalysatyn úkimettik emes uıymdardy granttar saıysyna qatysýǵa shaqyrady. Baǵdarlamanyń ekinshi kezeńi aımaqtyq bastamalardy qoldap, azamattyq qoǵamnyń tótenshe jaǵdaıdaǵy áreketin shyńdaýǵa baǵyttalady. Qoǵamdyq uıymdarǵa beriletin jalpy grant somasy – 30 mln teńge. Jobalar men sharalardy júzege asyrýǵa Osy jyldyń 1 qarashadan bastap 2021 jyldyń 30 sáýirine deıin 6 aı ýaqyt beriledi.
Bólingen qarajat aýyl-aımaqtarda turmystyq zorlyq-zombylyqtyń aldyn alý men joıýǵa (4,4 mln teńgege deıin); aımaqtardaǵy halyqqa tótenshe jaǵdaı kezinde aqparat berip, qoldaý kórsetýge, aımaqtyq úkimettik emes uıymdardyń tótenshe jaǵdaıda tıimdi áreket etýin pysyqtaýǵa, aımaqtardaǵy eriktiler qozǵalysyn damytýǵa baǵyttalǵan jobalarǵa (5 mln teńgege deıin); azamattyq qoǵamnyń tótenshe jaǵdaı kezindegi áreketi men ulttyq deńgeıde eriktiler qozǵalysyn damytýǵa arnalǵan onlaın resýrstardy qoldaýǵa (9 mln teńgege deıin) beriledi. Saıysqa qatysý úshin baǵdarlama saıtyndaǵy ótinimdi 19 qazanǵa deıin toltyrý kerek. Al nátıjeler bir aptanyń ishinde belgili bolady.
Osyǵan deıin Nur-Sultan jəne Almaty qalalarynda jobanyń birinshi kezeńinde 11 úkimettik emes uıym men 7 BAQ grant ıegeri atanǵan. Nátıjesinde, 1900-ge jýyq áleýmettik az qamtylǵan otbasyna kómek kórsetilip, Almaty qalasy men oblysyndaǵy provızorlyq stasıonarlardyń medısına qyzmetkerlerine 2300 túski jəne keshki as alynǵan. Odan bólek 500 jeke qorǵanys quraldary taratyldy. Múmkindigi shekteýli jáne esirtkige táýeldi jandarǵa 1500, shaǵyn bıznes ókilderine 1400 konsýltasııalyq keńes berildi. Sondaı-aq 100 eńbek mıgrantyna qoldaý kórsetilip, bıznesti damytýǵa 300 jeke jospar quryldy. Al BAQ-qa bólingen granttar COVID-19 týraly qazaq tilindegi aqparattyń sapasyn arttyrýǵa baǵyttalǵan.
