Sýretti túsirgen Erlan Álıasqarov
Arbaǵa tanylǵanyn ar sanamaıtyn Asylbektiń búgingi tańda júzege asyryp jatqan bastamasy keıbir qalada joq desek te bolady. Al Almaty oblysyna qarasty Qarasaı aýdanynda alǵashqylardyń biri bolyp, 2017 jyly ashqan «Kúsh-qýat» ońaltý ortalyǵynyń jumysy jandanǵannan beri ózimen taǵdyrlas talaı adamdardyń ómirge degen qushtarlyq sezimin oıatyp, jan jarasynyń jazylýyna sebepshi bolyp keledi.
Ortalyqty basqaryp otyrǵan Asylbektiń bul baǵytta jumys isteýine óziniń basynan keshkeni men jeke jattyǵýlarynyń nátıjesinde jaǵdaıynyń kóńil qýantarlyqtaı qalypqa jetkeni basty negizge aınaldy. Osylaısha, basqa da múmkindigi shekteýli jandarǵa úmit sáýlesin syılaıyn degen nıetpen ol atalǵan ortalyqty ashýǵa bel býǵan. Asylbektiń josparly jumysyn júzege asyrýyna Almaty oblysy «Atameken» kásipkerlik palatasynyń Qarasaı aýdandyq fılıaly qolǵabys etkenin de aıta ketken jón. Osy ortalyqtan aldymen bıznestiń qyr-syryn úırenetindeı bilimin jetildirip, arnaıy kýrsty oqyp shyqty. Keıin oǵan aýdandyq ákimdik Qaskeleńdegi «Altyn aýyl» yqsham aýdanynan jertóleni tıimdi baǵamen jalǵa alýyna qoldaý bildirdi.
Ashylǵanyna úsh jyl bolsa da «Kúsh-qýat» ońaltý ortalyǵynan osy ýaqytqa deıin jaǵdaıy jaqsaryp, Asylbek Jaldybaevqa alǵysyn jetkizgender de jeterlik. Kelýshilerdiń barlyǵy mundaǵy túrli qural-jabdyqtarǵa toly keń bólmelerde jattyǵýlaryn jasap, bilikti mamandardyń aqyl-keńesine júgine alady. Bir aıta keterligi, osy jerge Nur-Sultan, Shymkent sııaqty alys shalǵaı aımaqtardan da adamdar em-domyn qabyldaýǵa kelip turady. Olar úshin jatar oryn da qarastyrylǵan. Al joǵaryda biz aıtqan jattyǵýǵa arnalǵan qural-jabdyqtardyń barlyǵy ortalyq basshysynyń jeke qoldaýymen arnaıy jasalǵan. О́ıtkeni onyń osy baǵytta jumys isteıtin arnaıy shaǵyn óndiris orny bar ekenin de erekshe aıtýǵa bolady. Sol arqyly kásipke jany jaqyn Asylbek túrli ońaltý ortalyqtarynan arnaıy tapsyryspen jattyǵý quraldaryn da óndirip shyǵarýda.
Taǵdyrlas jandardyń ómirge degen qushtarlyǵyn arttyrsam dep júrgen Asylbektiń arqasynan qaǵyp, ıgi isin quptaıtyn jandar da bar. Áńgime barysynda A.Jaldybaev ásirese, Qaskeleń qalasynyń ákimi Asqar Muqashevtiń jomarttyǵyna erekshe toqtaldy.
– Arbadaǵy adamdar úshin bizdiń ortalyqqa baspaldaqpen kirip-shyǵý, rasymen de qıynǵa tústi. Birde osyny baıqaǵan qala basshysy Asqar О́kenuly óz qarajaty esebinen azamattyǵyn tanytyp, joǵary-tómen avtomatty túrde jyljıtyn pandýsty syıǵa tartty. Osy qoldaýy úshin rızashylyǵymdy bildiremin, – deıdi «Kúsh-qýat» ońaltý ortalyǵynyń dırektory.
Asylbek Jaldybaev bilikti zańger bolýdy armandap, joǵary oqý ornyn da támamdaǵan. Alaıda aıtyp kelmeıtin avtokólik apaty onyń bolashaǵyn bulyńǵyr etti... Keıipkerimiz sonda da keleshegine kúlimdep qaraýdy maqsat etip, ón boıyna daryǵan sporttyq qabiletin múmkindigi shekteýli bolsa da damyta túsedi. Sonyń nátıjesinde osy ýaqytqa deıin túrli paralımpıadalyq oıyndarda qol kúresi, júzý sııaqty sport túrlerinen jeńispen oralyp júr. Tipti, aýdannyń abyroıyn oblystyq jarystarda da qorǵap, 1-2 oryndardy qanjyǵaǵa baılaýdy ádetke aınaldyrǵan. Osyndaı jemisti jetistikterin maqtana eske alǵan jigerli Asylbek bylaı deıdi: «Adam qandaı jaǵdaıǵa tússe de ózin eshqashan tómen sanamaýy kerek. Qaıǵy-muńǵa berilmeı, onymen kúrese bilý – naǵyz erliktiń isi. Bizge ómir bir-aq ret beriledi. Ony tamasha súrý óz qolymyzda. Ýaqyty ótip ketkender qanshama. Sondyqtan ǵıbratty ǵumyr keshe bilgen durys».
Biz tanyǵan Asylbek, mine, osyndaı. Onyń endigi maqsaty – ózi basshylyq etip otyrǵan ońaltý ortalyǵynyń kókjıegin keńeıtip, múgedektigi bar jandardy jan-jaqty qoldap, qoldan kelgenshe olardy aıaqtarynan tik turǵyzý. Ol osy ıdeıasyn júzege asyrý úshin memleket tarapynan qoldaý kútetinin aıtty. «Armansyz adam – qanatsyz quspen teń» degendeı, Asylbektiń mejeli maqsaty oryndalýyna biz de tilekshimiz.
Dıdar MÁLIKULY,
jýrnalıst
Almaty oblysy,
Qarasaı aýdany,
Qaskeleń qalasy
