Qapshaǵaıdaǵy «Etekbaev» sharýa qojalyǵy 10 jyldan beri jazdyq arpa, kartop jáne kókónister egýmen aınalysady. Qojalyq sońǵy jyldary qant qyzylshasyna kóbirek kóńil bóle bastady. Bıyl da 40 gektar jerge qyzylsha egip, jaz boıy tynbaı eńbek etip, tókken mańdaı terdiń arqasynda gektarynan 700 sentnerden mol ónim alyp otyr.
"Mundaı jaqsy nátıjege úkimet jáne jergilikti bılik tarapynan kórsetilgen qoldaýlarlardyń arqasynda jetip otyrmyz. Der kezinde egistiktiń sýǵarylǵany, tyńaıtqyshtarǵa arnalǵan sýbsıdııalar berilip otyrǵanynyń ózi – bizge úlken kómek. Otandyq ónimdi qoldaý arqyly qantpen ózimizdi-ózimiz qamtı alatyndaı dárejege jetýge múmkindigimiz bar» - deıdi «Etekbaev» sharýa qojylyǵynyń basshysy Nurlan Etekbaev.
Dál osyndaı egistikpen shuǵyldanatyn «Baýyr» sharýa qojalyǵynyń da osy jylǵy ónimi jaman emes. Bıyl 100 gektar jerge jazdyq arpa, 10 ga súrlemge arnalǵan júgeri, 10 ga jońyshqa jáne 23 gektar pııaz otyrǵyzǵan. Jalpy egistik jeri 143 gektardy alyp otyr. Sheńgeldi aýmaǵyndaǵy iri qojalyqtardyń biri sanalatyn bul qojalyq pııazǵa basymdyq bergen. О́nimniń ótimi joǵary, suranysqa ıe. Olar ósirgen pııazdy Qazaqstanda ǵana emes, Reseıde de tutynýshylar kóp. Dál qazirgi tańda sharýalar ónimdi býyp-túıip qoımaǵa qoıý úshin ázirlik jumystaryn júrgizýde. Qoımaǵa ázirge 600 tonnadaı ónim jınalady.
Jalpy Almaty oblysynda egin naýqany qarqyndy júrip jatyr. Bıylǵy jyly óńirde egistik alqaby 968,6 gektardy quraǵan. О́nim shyǵymy jaqsy. Kartop, jemis-jıdek, kókónis, baqsha ónimderi, mal azyǵy, júzim alqaptarynda kúzgi jıyn-terin tolǵyǵymen aıaqtalsa, dándik jáne maıly daqyldardy jınaý jumysy da edáýir eńserilgen. Sonyń ishinde kartoptyń, jemis-jıdektiń, maıly daqyldardyń, dándik júgeriniń ónimdiliginde byltyrǵyǵa qaraǵanda ósim bar.
