Burnaǵy kúni «Samuryq-Qazyna» AQ basqarma tóraǵasy О́mirzaq Shókeev bokstan WBA nusqasy boıynsha orta salmaqtaǵy álem chempıony Gennadıı Golovkındi qabyldady. Áńgime barysynda kásipqoı boksshynyń Prezıdenttiń «Astana» kásipqoı sport klýbyna kirý máselesi talqylandy.
Burnaǵy kúni «Samuryq-Qazyna» AQ basqarma tóraǵasy О́mirzaq Shókeev bokstan WBA nusqasy boıynsha orta salmaqtaǵy álem chempıony Gennadıı Golovkındi qabyldady. Áńgime barysynda kásipqoı boksshynyń Prezıdenttiń «Astana» kásipqoı sport klýbyna kirý máselesi talqylandy.
«Biz Gennadııdiń tabystaryn zor maqtan tutamyz. Ol – álemdik deńgeıdegi juldyz, qubylys. Biz eń kórnekti sportshylardy óz klýbymyzǵa tańdap alǵymyz keledi. Bul oǵan erekshe mártebe beredi. О́ziniń mártebesin kóterý úshin bul Golovkınge de kerek», – dedi О́.Shókeev kezdesý barysynda.
Tóraǵa óz sózinde Prezıdent kásipqoı klýbyn qurý Qazaqstannyń álemdik arenadaǵy bedelin kótere túsý maqsatyn kózdegenin aıtty. «Biz Gennadııdiń osy klýb sapynda óner kórsetýi men onyń sporttaǵy bastamalary osy úlken jumysqa orasan zor tıimdilik ákeletinine senimdimiz», – dep atap ótti О́.Shókeev.
G.Golovkınniń aıtýynsha, ol óziniń Prezıdenttiń «Astana» sport jobasy týy astyna birikken sportshylardyń qatarynda óner kórsetýge shaqyrylǵanyn zor maqtanysh etedi.
«Men budan bylaı «Astana» klýby atynan óner kórsetetinime óte qýanyshtymyn jáne ony zor maqtan tutamyn. Endi meniń basty demeýshim «Samuryq-Qazyna» ál-aýqat qory bolady. Biz «Astana» klýbyn álemdik deńgeıde tanyta beretin bolamyz», – dedi kezdesýden keıin Gennadıı Golovkın.
Al keshe Gennadıı Golovkınniń «Astana» kásipqoı klýby quramyna qabyldanǵany jónindegi tıisti qujattar jasaldy. Aıta ketetin jaıt, 2012 jyldyń sońynda qurylǵan Prezıdenttiń «Astana» kásipqoı sport klýby óziniń aıasyna Qazaqstannyń úzdik sport klýbtaryn toptastyryp keledi. Onyń sapynda qazir álemdik deńgeıdegi «Astana Pro Team» velosport klýby, basketbol jáne fýtbol komandalary, «Barys» hokkeı jasaǵy, «Astana Dakar Team», «Astana Arlans» boksshylary, sý jáne at polosy ujymdary, «Qazaqstan barysy» ulttyq kúres jobasy, sondaı-aq, aýyr atletıkadan Olımpııalyq oıyndardyń eki dúrkin chempıony Ilıa Ilın men mánerlep syrǵanaýdan álem chempıonatynyń kúmis júldegeri Denıs Ten bar.
Rýslan IGILIK.
