Jas kásipker «Sybaǵa» baǵdarlamasy aıasynda tómengi paıyzdyq mólsherlememen nesıe alyp, 85 mıllıon teńgege 200 bas asyl tuqymdy sıyrdy Reseıden ákelgen.
Qazirgi tańda Nurperzent Sovetov basqaratyn «Qaırat» sharýa qojalyǵy aýdan boıynsha iri fermerlik kásiporyndardyń birinen sanalady. Sharýashylyqta Hakasııadan satyp ákelingen asyl tuqymdy iri qaradan basqa qazaqtyń aqbas sıyrlary da ósiriledi.
«Qazir memleket kásip ashyp, eńbek etemin degen jastarǵa barynsha qoldaý kórsetip otyr. Mysaly, tómen paıyzdyq mólsherlememen nesıeler beriledi. Iаǵnı, adal kásippen mal tabamyn degenge jaǵdaıdyń bári jasalǵan», deıdi jas kásipker.
Nurperzent Sovetovtiń sóziniń jany bar. Onyń sharýa qojalyǵy jyl saıyn memleketten 4 mln teńge mólsherinde sýbsıdııa alyp turady. Munyń ózi mal baqqan qaýym úshin ájeptáýir qoldaý.
Búgingi kúnde sharýa qojalyǵynyń basshysy kásibin ári qaraı dóńgeletip, sharýashylyǵyn keń aýqymda júrgizýdi oılastyryp júr. Atap aıtqanda, sút ónimderi klasterin damytý josparynda bar.
Qazirgi ýaqytta «Qaırat» sharýa qojalyǵynda alty adam eńbek etedi. Olar turaqty eńbekaqymen ǵana emes, mal azyǵymen, qysta jaǵatyn otynmen jáne et ónimderimen qamtamasyz etilgen.
