BALÝANDAR BOZ KILEMDE BAǴALANADY

Almatyda grek-rım kúresinen “Qazaqstandyq chempıon balýandar – qurmet tuǵyrynda” atty sporttyń osy túrin damytý maqsatynda qabyldanǵan baǵdarlamany iske asyrý jáne ulttyq quramaǵa sportshylardy irikteý maqsatynda el birinshiligi ótti. Oǵan elimizdiń 14 oblysy men Astana jáne Almaty qalalarynan 170-ke jýyq balýan qatysyp, 7 salmaq dárejesi boıyn­sha kúsh synysty. Bul básekege Beıjiń Olımpıadasynyń qola júldegeri Nurbaqyt Teńizbaev pen Áset Mámbetov, Azııa chempıony Darhan Baıahmetov, Gran-prı jarysy men Ivan Poddýbnyı týr­nıri­niń jeńimpazy Almat Kebisbaev sııaq­ty balýan­dar qatysqan joq. Olardyń ornyn Mar­ǵulan Ásembekov, Eldar Qaıratov, Beıbit Nuǵmanov, Ashat Qudaıbergenov pen Andreı Samohın basty. Chempıonatta osylardyń ishinen soń­ǵy­synan basqalarynyń bári jeńis tuǵy­ry­nyń bıik satysynan kórindi. Atap aıtqanda, 55 kılo salmaqta Qazaqstannyń ótken jylǵy chempıony Ashat Qudaıber­genov bıyl da babynda ekenin kórsetip, bas júldeni jeńip aldy. Kelesi 60 kılo salmaq­ta Marat Kárishalov aqtyq synda tájirı­beli balýandardyń biri Erbol Qońy­ra­tovtyń jaýyrynyn jerge tıgizip, tuńǵysh ret eresekter arasynda chempıon atandy. Budan keıin 66 kılo salmaqta bolǵan balýandar beldesýi asa tartysty ótkenin atap ótý jón. Osy salmaqta “Dostyq” sport kesheninde tóselgen kilemde elimiz­diń myqty degen balýandary kúsh synas­ty. Degenmen bas júlde baby men baǵy kelisken Eldar Qaıratovqa ǵana buıyrdy. Áıtpese onymen beldesip, kúmis júldeni ıelengen Beıbit Nuǵmanov pen qola júl­de­ni qanaǵat tutqan Shyńǵys Qaıyr­maǵan­betovti jáne Nurdáýlet Ermuratov­ty osal balýandar eken dep aıta almaımyz. Bıylǵy básekede budan basqa Áset Ádilov (74 kg), Álzahýr О́zdıev (84 kg), Jasulan Sadyqov (96 kg) óz salmaq dárejelerinde chempıon atandy. Al 120 kılo salmaqta Azııanyń eki dúrkin chempıony Marǵulan Ásembekov fınalda Ábdimálik Sartpaevtyń aldyn orap, bas júldeni jeńip aldy. Chempıonat sońynda balýandardyń báseke­sine qanaǵattanarlyq baǵa bergen kúres federasııasynyń qurmet­ti prezı­denti, “Samuryq-Qazyna – Asta­na” kor­poratıvti qorynyń bas dırek­tory, FILA bıýrosynyń múshesi Dáýlet Turly­hanov pen federasııa basshysy Bekzat Sar­manov birinshi oryndy ıelen­gen balýan­dar­dyń bári ulttyq quramaǵa alynatynyn aıtty. – Qazir bizdiń basty maqsatymyz – jańa qurama jasaqtap, Qytaıda ótetin jazǵy Azııa oıyndarynda bas júldeni jeńip alý. Odan basqa bıylǵy chempıo­nat­qa qatysa almaǵan Nurbaqyt Teńizbaev­tyń aldyna Máskeýde ótetin álem chem­pıo­natynda altyn medaldi jeńip alý týra­ly mindet qoıylyp otyr, – dedi Dáýlet Bolatuly. Al ulttyq quramanyń bas bapkeri Muratbek Qasymhanovtyń aıtýynsha, chempıonattan keıin balýandardyń bári oqý-jattyǵý jıyndarynda birge bolyp, mamyr aıynda Úndistanda ótetin Azııa chempıonatyna daıyndalady. Osy jattyǵý qurlyq birinshiligine kimderdiń qatysa­tynyn kórsetedi. Dastan KENJALIN