Qazirgi tańda barlyq qajetti normatıvtik-quqyqtyq akti tıisti memlekettik organdarmen kelisilip, qyzmetter egov.kz portalynda testileýden ótip jatyr. Normatıvti aktiler kúshine engennen keıin kez kelgen azamat bul qyzmetterdi onlaın túrde surata alady.
«Azamattarǵa arnalǵan úkimet» memlekettik korporasııasy basqarma tóraıymynyń orynbasary Mádı Sadanovtyń aıtýynsha, jer qatynastaryna baılanysty qyzmetterdi alý qashanda qıyndyqtarymen erekshelenip kelgen.
«Jer boıynsha kórsetiletin qyzmetterdiń kóp bóligi tek qaǵaz túrinde jáne qyzmet alýshynyń memlekettik korporasııanyń front-ofısine tikeleı barýymen ǵana usynyldy. Sıfrlyq tehnologııalar dáýirinde turǵylyqty jerge baılanyp, qyzmettiń nátıjesin birneshe kún, tipti birneshe apta kútý, árıne, orynsyz. Sondyqtan biz jer qatynastary salasynda eń kóp suranysqa ıe qyzmetterdiń kórsetilý merzimin qaıta qarastyryp, barynsha azaıttyq. Sonymen qatar egov.kz portaly arqyly alý múmkindigi turǵylyqty jerine qaramastan álemniń kez kelgen jerinde otyryp alýǵa jol ashady. Basty talap – elektrondy sıfrlyq qoltańbanyń bolýy», dedi M.Sadanov.
Máselen, eger buryn MJK AAJ grafıkalyq málimetterimen jobalanatyn jer ýchaskesin kelisý merzimi 15 kúntizbelik kún bolsa, qazir ol 7 jumys kúnine deıin, al jeke sáıkestendirý qujatyn daıyndaý ýaqyty 6 jumys kúninen 4 kúnge deıin qysqardy. Memlekettik jer kadastrynan aqparat berý merzimi 3 jumys kúninen 15 mınýtqa deıin qysqardy. Barlyq bes qyzmet boıynsha da solaı.
Aıta keteıik, jańa qyzmetter egov.kz portalynyń «Jyljymaıtyn múlik» bólimindegi «Jer qatynastary» tarmaǵynda qoljetimdi bolady. Eske sala keteıik, buǵan deıin Prezıdent Qasym-Jomart Toqaev halyqqa arnaǵan Joldaýynda bıznes-prosesterdi múmkindiginshe sıfrlandyrýdy tapsyrǵan bolatyn.
Qoǵammen baılanys departamentiniń bas mamany Jazıra Oqýbaevanyń aıtýynsha, bıyl 9 aıda «Azamattarǵa arnalǵan úkimet» memlekettik korporasııasynyń front-ofısteri arqyly jer ýchaskesine 205 myńnan astam akt, jer ýchaskesiniń kadastrlyq (baǵalaý) qunyn anyqtaý boıynsha 17 myń qyzmet, memlekettik jer kadastrynan 4 myńǵa jýyq aqparat, jerdiń sapasy týraly jarty myńǵa jýyq aqparat berildi. Sondaı-aq shamamen 52 myń jer ýchaskesi kelisildi.
