EKI TÝRNIRDE TО́RT ALTYN

Jaqynda Qazaqstan quramasynyń boksshylary Túrkııa men Qytaıda ótken halyqaralyq týrnırlerden keldi. Ystambul qalasynda erler jáne áıelder arasynda “Premer-mınıstr” básekesine qatysqan bylǵary qolǵap sheberlerimiz 2 altyn, 1 kúmis, 4 qola medaldi enshilese, Gýııang qalasynda “Chaına Oýpen” týrnırinde kúsh synas­qan boksshylarymyz 2 altyn, 2 kúmis jáne 3 qola medal­di jeńip aldy. Qytaıda 3-11 sáýir aralyǵynda ótken synda qolǵap túıistirgen 20 eldiń 102 boksshysy arasynda Meıirjan Raqymjanov (54 kg), Manat О́mirzaqov (69 kg) bas júldeni ıelense, Ilııas Súleımenov (48 kg) pen Nısaı Baımatov (75 kg) kúmis medaldi, al Ǵanı Jaılaýov (60 kg), Batyrjan Júkenbaev (64 kg), Marat Qııasov (81 kg) qola júldeni qanaǵat tutty. Túrkııada 6-12 sáýir kúnderi ótken týrnırde erler arasynda Mardan Berikbaev (48 kg), Rústem Sybaev (69 kg), Ivan Dychko (91 kg-den joǵary) qola medaldi enshilese, áıelder arasynda Názgúl Boranbaeva (48 kg) men Juldyz Mamatqulova (81 kg) qurmet tuǵyrynyń eń bıik satysynan kórindi. Al Saıda Qasenova (64 kg) kúmis júldeni, Nazym Qazybaı (46 kg) qola medaldi moıyndaryna taqty. Endi Qazaqstan quramasynyń erler jáne áıelder komandasy 20-25 sáýir aralyǵynda Polshanyń Varshava qalasynda ótetin HHVII dástúrli “Felıks Stamm” halyqaralyq týrnırine qatysady. Týrnır AIVA erejesi boıynsha erler arasynda 11 salmaq dárejesi, al áıelder arasynda 48-51 kg, 56-60 kg jáne 69-75 kg salmaq dárejelerinde ótedi. Bul básekege ulttyq qurama sapynda erler arasynda Birjan Jaqyp (48kg), Danııar Tólegenov (54 kg), Danııar Eleýsinov (64 kg), Serik Sápıev (69 kg), Nurdáýlet Jarmanov (75 kg) pen Rústem Irgebaev (91 kg-den joǵary) qatysady. Budan keıin jastar arasyndaǵy ulttyq qurama 20 sáýir men 2 mamyr aralyǵynda Ázirbaıjannyń astanasy – Baký qalasynda ótetin álem chempıonatynda kúsh synasady. Komandanyń aǵa bapkeri Nazar Ilııasov bastaıtyn chempıonatqa jastarymyz eki qurammen barady. Esterińizge sala ketsek, munyń aldynda Irannyń astanasy – Tehran qalasynda ótken Azııa chempıonatynda jastar quramasy 4 altyn, 1 kúmis jáne 2 qola medal jeńip alǵan bolatyn.