Jambyl oblysynyń prokýrory Nurǵalym Ábdirov pen oblystyq Polısııa departamentiniń bastyǵy, general-maıor Janat Súleımenov atalǵan jobanyń iske asyrylý barysymen tanysty. Bul joba aǵymdaǵy jyldyń 1 qazanynan bastap engizilgen bolatyn.
Qanatqaqty joba Memleket basshysy Qasym-Jomart Toqaevtyń Joldaýynda aıtylǵan tapsyrmalarmen birge "Sıfrlyq Qazaqstan" memlekettik baǵdarlamasy aıasynda iske asyrylýda. Sonymen qatar, joba proseske qatysýshylardyń konstıtýsııalyq quqyqtaryn qorǵaýǵa, qylmystyń jaı-kúıi týraly derekterdiń anyqtyǵyn qamtamasyz etýge, manıpýlıasııalar men burmalaýshylyqtardy qysqartýǵa, tergep-tekserý prosesin ońtaılandyrýǵa, proseske qatysýshylardyń baılanystaryn barynsha azaıtýǵa baǵyttalǵan. Jambyl oblystyq Polısııa departamentiniń málimetinshe, bul jobanyń ereksheligi – prokýrorlar buryn tergeý organy derbes qabyldaǵan negizgi prosedýralyq sheshimderdi elektrondy formatta aldyn-ala kelisedi jáne azamattardy qylmystyq qýdalaý sheńberine zańsyz tartýdy boldyrmaýǵa kómektesedi. Jańa jobany tıimdi engizý maqsatynda oblys ákimdiginiń qoldaýymen 250 jumys ornyn jabdyqtaý úshin 160 mıllıon teńgege kompıýterlik tehnıka satyp alynǵan.
Jumyspen tanysý barysynda óńir prokýrory men oblystyń bas polıseıi naqty ýaqyt rejıminde sotqa deıingi tergep-tekserýdiń biryńǵaı tizilimi bazasynda elektrondyq jekelegen prosestik sheshimderdi daıyndaý prosesin kórdi. Sodan keıin olar prokýrorǵa kelisý úshin jiberildi. Sondaı-aq, olar qalalyq polısııa bólimi men prokýratýranyń ózara is-qımyl prosesimen tanysty. Oblys prokýrory Nurǵalym Ábdirov jobany apta saıyn qorytyndylaýdy, jumystaǵy kemshilikterdi azaıtýdy jáne elektrondyq júıeni jetildirý boıynsha usynystar engizýdi tapsyrdy. Al, oblystyq Polısııa departamentiniń bastyǵy Janat Súleımenov anyqtaýshylar men tergeýshilerdi únemi oqytý jáne biliktiligin arttyrý qajettigi týraly aıtty.
Kezdesý sońynda "Taraz – qaýipsiz qala" tujyrymdamasy aıasynda oblys ortalyǵyndaǵy qylmystyq ahýalǵa baılanysty arnaıy keńes ótti.
