Kúrmeýge kelmes qysqa ǵumyrynda ol sońyna óshpes mura qaldyrdy. Otyz jetiniń oıranyn, Alash arystarynyń qasiretin jyrlaǵan "Qara mashına" óleńiniń ózi aqynnyń adýyn minezin kórsetken shyǵarma. Jaryq dúnıeden jalt etip óte shyqqan aqynnyń bıyl týǵanyna alpys jyl tolyp otyr. Osy oraıda, Taraz qalasyndaǵy Sh.Ýálıhanov atyndaǵy oblystyq ámbebap-ǵylymı kitaphanasynda "Bizdiń sezim kúzde óngen gúl sııaqty…" atty aqyndy eske alý keshi ótti. Basqosýǵa aqynnyń kózkórgen dostary, otbasy men oqyrmandary qatysty.
Sharany aqynnyń kýrstas dosy, Qazaqstan Jýrnalıster odaǵynyń múshesi, oblystyq "Aq jol" gazetiniń bólim redaktory Amangeldi Ábil sóz sóılep ashyp, júrgizip otyrdy. Qalamgerdiń jastyq shaǵy, stýdenttik kezdegi tanystyqtary týraly estelikter aıtty. Sondaı-aq, aqynnyń dosy, "Salyq tártibi" gazetiniń bas redaktory Ǵalym Qasabaı da Baýyrjan Úsenov jaıynda jyly lebizin bildirdi. Ádebı kesh barysynda aqynnyń jary Gaýhar Tajkenova, uly Muhamedsalyq Úsenov, qaryndasy Álııa Kebekbaeva, inisi Birjan Úsenovter de aqyn týraly estelikterimen bólisti. Budan keıin aqynnyń kýrstasy, Qazaqstan Jýrnalıster odaǵynyń múshesi Qýanysh Iemberdıev Baýyrjan Úsenovtiń alpys jyldyǵy karantınge baılanysty atalyp ótpegenimen, ony aldaǵy ýaqytta da joǵary deńgeıde atap ótýge bolatynyn jetkizdi. Sonymen qatar, Áýlıeata jerinde aqynnyń eskertkishi ornatylsa degen usynysyn aıtty. "Baýkeńniń dosy, talantty bard aqyn Tabyldy Dosymovtyń eskertkishi týǵan jerinde ornatylǵanda bizde de Úsenovtiń eskertkishi qasqaıyp tursa degen oı týǵan edi. Endi demeýshilerdiń, ádebıetsúıer azamattardyń qoldaýymen bolsa da aqynnyń týǵan topyraǵynda eskertkishi ornatylsa jón bolar edi", dedi ol.
Sondaı-aq, basqosý barysynda oblystyq "Aq jol" gazetiniń bas redaktory Oralhan Dáýit, oblystyq "Jambyl" telearnasynyń dırektory Meıirjan Álibekuly, oblystyq "ARAI" jastar gazetiniń bas redaktory Dáýlet Tólendi de aqyn shyǵarmashylyǵy týraly oılaryn aıtty. Al, atalǵan sharaǵa Polshadan arnaıy kelgen aqynnyń uly Muhamedsalyq Úsenov ákesiniń ataqty "Qara mashına" óleńin oqyp berse, sharany tikeleı onlaın túrde tamashalap otyrǵan Jýaly aýdandyq kitaphanasynyń oqyrmandary Baýyrjan Úsenovtiń jyrlaryn jatqa aıtty. Sonymen qatar, belgili aqyndar Svetqalı Nurjan men Baýyrjan Jaqyptyń da estelikteri aıtyldy. Shara sońynda Baýyrjan Úsenovtiń sózine jazylǵan jáne aqynnyń ózi shyǵarǵan ánderi de oryndaldy.
