Hakim Abaıdyń shyǵarmashylyǵy óte orasan bilim, qazyna. Ony bir aıda nemese bir jylda balalarǵa sińirý ońaı sharýa emes, sondyqtan bilimdi kishkentaıynan bastap adam boıyna sińirgenshe qamtamasyz etý kerek. Balabaqshada Abaı óleńderin jattatý, qara sózderin oqyp, mazmunyn ashyp túsindirý, aqparattyq-kommýnıkatıvtik ashyq sabaqtar ótkizý arqyly tanystyrýǵa bolady. Onyń kishkentaı kezindegi aqyl-parasattylyǵy men danalyǵyn teatrlyq qoıylym retinde kórsetý bilimdi jetkizýdiń tyń tásili. Aqynnyń qarasózderiniń ózi bir tylsym dúnıe. Baldyrǵandarǵa jetkizý sál aýyrlaý bolǵanymen, keıbir qarasózderin úıretip túısindirýge bolady. Mysaly, jetinshi sózi:
«Jas bala anadan týǵanda eki túrli minezben týady: bireýi – ishsem, jesem, uıyqtasam dep turady. Bular – tánniń qumary, bular bolmasa, tán janǵa qonaqúı bola almaıdy. Ne kórse soǵan talpynyp, jaltyr-jultyr etken bolsa, oǵan qyzyǵyp, aýzyna salyp, dámin tatyp qarap, tamaǵyna, betine basyp qarap, syrnaı-kerneı bolsa, daýysyna umtylyp, onan erjetińkiregende ıt úrse de, mal shýlasa da, bireý kúlse de, bireý jylasa da tura júgirip, «ol nemene?», «bul nemene?» dep, «ol nege úıtedi?» dep, «bul nege búıtedi?» dep, kózi kórgen, qulaǵy estigenniń bárin surap, tynyshtyq kórmeıdi. Munyń bári – jan qumary, bilsem eken, kórsem eken, úırensem eken degen». Baldyrǵandarǵa jan qumaryna shaqyrarlyq is-áreketterdi úırenýin, boıyna toqýyn osy sózi arqyly jetkizý durysyraq.
Abaı ómirbaıanyn kezeń-kezeńge bólip, ony balalardyń jas ereksheligine qaraı qoıylym, kishigirim teatr ispettes sabaqtarmen jetkizý jeńilirek. О́ıtkeni obrazdyq qoıylymdar, ásirese keıipker retinde ony somdaǵan bala málimetti tez qabyldaıdy. Qoıylym barysynda sol dáýirge sapar shegilip, Abaıdyń aýylynda bolyp qaıtqandaı sezim bala mıynda tez saqtalady. Sol dáýirdegi qoldanǵan aspaptardy, kıgen qazaqy kıimderimizdi, ata-babalarymyzdyń qalaı ómir súrgendigin jetkizý – tarıhymyzdy sińirýge septigin tıgizbek. Osy oraıda bizdiń №62 «Botaqan» bóbekjaı balabaqshasy da óz úlesin qosýda. Eńbek jolymda uly aqynnyń «Adamnyń adamshyldyǵy – aqyl, ǵylym, jaqsy ata, jaqsy ana, jaqsy qurby, jaqsy ustazdan bolady» degen naqyl sózin árdaıym qoldana otyryp, balabaqsha adam ómirindegi eń birinshi qalyptasatyn baspaldaq dep bilemin.
Ulmıra DOSBERGENOVA,
balabaqsha tárbıeshisi
ShYMKENT
