Lıýdmıla Týrısheva – Groznyıda týǵan cheshen ultynyń ókili. Ol keńestik gımnasshy Larısa Latynına sııaqty Olımpıadadan kúrep medal almasa da, rýmynııalyq maıtalman Nadıa Komanechı sekildi jańa elementtiń avtory atanbasa da ataq-dańqy olardan kem emes.
Alǵash Mehıko Olımpıadasynda (1968) altyn medaldiń dámin tatqan Lıýdanyń jetistigi tym jedel ósti. Ol 1970 jylǵy álem birinshiliginde barlyq element boıynsha úzdik kórsetkishke ıe bolsa, osy jetistigin Eýropa chempıonatynda taǵy qaıtalady. Jalpy, Týrıshevanyń esebinde: Olımpıadalar, álem, qurlyq birinshilikteri men úlken týrnırlerden jeńip alǵan 137 medal bar eken. Osylardyń ishinde: Olımpıadalardyń 9 (4 altyn, 3 kúmis, 2 qola), álem chempıonattarynyń 11, Eýropa chempıonattarynyń 14 medali bar.
Dostary hám áriptesteri ony «Temir Týrısheva» dep ataıdy. Bul – onyń qajyrlyǵy men qaırattylyǵyna berilgen baǵa. 1975 jyly Týrısheva London qalasynda Álem kýbogy jolynda óner kórsetip jatty. Kenet yrǵalyp turǵan qoltyq aǵash (brýsıa) kútirlep syna bastaıdy. Lıýda esh saspastan barlyq elementterin tolyq oryndap, kórermenge ıilip sálem jasaıdy. Dál osy sátte qoltyq aǵash opyrylyp túsipti.
1972 jyly jalaýyn kótergen Mıýnhen Olımpıadasynan keıin kópshilik Týrısheva sporttan ketetin shyǵar degen oıda júrdi. О́ıtkeni, alda bolatyn Monreal Olımpıadasyna daıyndyq kezinde qatty jaraqattanyp qaldy. Bir jyldaı emdelýge týra keldi de, Olımpıadaǵa sanaýly aılar qalǵanda jattyǵýǵa kiristi. Lıýdmıla medal alady dep eshkim úmittenbedi. Biraq «Temir Týrısheva» temirdeı minez tanytyp, Olımpıadanyń 4 dúrkin chempıony atandy.
Sońǵy Olımpıadadan keıin Lıýdmıla sportty doǵardy. 1977 jyly ataqty jelaıaq, Olımpıadanyń eki altyn, bir qola medal ıegeri Valerıı Borzov ekeýi shańyraq kóterdi. Mıýnhen Olımpıadasy kezinde eki jas jasyndaı jarqyldap kózge túsken bolatyn.
Jubaıy Valerıı Borzov ta sporttyq jolyna núkte qoıǵan soń Ýkraınanyń jastar odaǵyn basqardy. Sońynan eldiń sport mınıstri boldy. Al Lıýdmıla bolsa, bir kezderi Ýkraınanyń gımnastıka federasııasynyń prezıdenti mindetin oıdaǵydaı atqardy. 1980-jyldardyń basynda Halyqaralyq gımnastıka federasııasynyń sporttyq gımnastıka túri boıynsha tehnıkalyq baqylaý bólimin basqardy. 1998 jyly HOK-tiń (Halyqaralyq Olımpıada komıteti) mártebeli marapaty «Sport jáne áıel» syılyǵynyń ıesi atandy.
Qazir Lıýdmıla men Valerııdiń qyzy Tanıa kórkem gımnastıkamen aınalysyp júr.
