«8 jyldyq tarıhy bar qurylysy uzaqqa sozylǵan taǵy bir nysannyń qurylysy aıaqtalýǵa jaqyn qaldy. «Jaǵalaý-3» turǵyn úı kesheninde ornalasqan 30-blokta 600-den astam aldanǵan otbasy bar. Turǵyndarmen birneshe ret bolǵan kezdesýler barysynda kezeń-kezeńmen qurylys kestesin ázirledik. Sheshilmegen máseleler kóp boldy. Qazirgi ýaqytta úı ortalyq sýmen jabdyqtaýǵa, jylý men kárizge qosyldy. Turǵyn úı keshenin turaqty energııamen jabdyqtaý jelilerine qosý boıynsha jumystar júrgizýdemiz-qazir úı ýaqytsha elektrmen jabdyqtalýda.
Qasbettik bólik boıynsha jumystar aıaqtaldy, abattandyrý jumystary aıaqtalý satysynda: úlken aýladan basqa, fýtbol jáne basketbol alańyn ornatý boıynsha da jumys isteımiz. Jaqyn arada jumysshylar kireberisterdi ishki árleýge kirisedi, lıftilerdiń bir bóligin ornatty, olar boıynsha jumystar jalǵasýda.
«Jaǵalaý-3» 30-blok qurylysyn aıaqtap, úıdi bıylǵy jyldyń sońyna deıin paıdalanýǵa berýdi josparlap otyrmyz. Úleskerler Jańa jyldy kópten kútken páterlerinde qarsy ala alady.
Sonymen qatar, «Jaǵalaý-3» 28 jáne 29 blogynyń qurylysyn aıaqtaý boıynsha jumystar júrgizýdemiz.
Qurylysy uzaqqa sozylǵan nysandardyń qurylysyn qaıta bastaý jáne aıaqtaý – ońaı másele emes, árbir úı jeke jumysty talap etedi. Osy baǵytta tıisti jumystar júrgizemiz», – dep jazdy Altaı Kólginov.
