Amerıkalyq ataqty ánshi Tına Terner AQSh azamattyǵynan bas tartty. Bul týraly Washington Post gazetiniń ınternet-nusqasynda taraǵan derekke súıengen «Pravda.Rý» portaly habarlady.
Onlaın-gazette AQSh-tyń Berndegi elshiliginiń deregine silteme jasalady. Onda aty ańyzǵa aınalǵan ánshiniń óz erkimen azamattyqtan bas tartatyny aıtylǵan. Gazet málimetine qaraǵanda, 74 jastaǵy ánshi ózin Amerıkamen tek otbasy ǵana jalǵap turǵanyn alǵa tartady. Keleshekte de ol bul elde turýǵa nıetti emes. Buǵan qosa, sońǵy 20 jyldan beri Shveısarııada nemis prodıýseri Ervın Bahpen birge turyp kele jatyr. Olar ótken jyly jazda úılenipti. Osydan shamaly ǵana ýaqyt buryn ánshi Shveısarııanyń azamattyǵyn alyp úlgeripti.
Halyqaralyq Grammy syılyǵyn segiz márte jeńip alǵan ánshi óziniń sahnalyq mansabyn 2009 jyly aıaqtapty.
Murat Aıtqoja.
