Apat aýmaǵynda qıraǵan úıler qalpyna kelip, Myrzakentte jańa shaǵynaýdan boı kóterdi. Qaz - qatar tizilgen aqshańqan úılerdiń árqaısysynyń aýmaǵy 100 sharshy metr bolatyn shaǵynaýdanda aýyzsý, "kógildir otyn" sııaqty ınfraqurylym máselesi tolyqqandy sheshimin tapqan. Maqtaaraldyqtarǵa tańsyq káriz júıesine deıin júrgizilgen. Eki aralyqta sándi saıabaǵy jáne bar. Keler jyly bul aýmaqta 1200 oryndyq mektep halyq ıgiligine usynylmaqshy. Osylaısha eldiń yntymaǵy men birligi, qoldaýy men qamqorlyǵy, Elbasynyń sarabdal saıasaty, Memleket basshysy Q. Toqaevtyń tapsyrmasy, Úkimettiń kómegi, oblys ákimi О́. Shókeev bastaǵan komandanyń uıymdastyrý -úılestirýdegi qajyrly eńbeginiń nátıjesinde maqtaaraldyqtardyń bastan ótkergen qıyndyqtary kórgen tústeı bolyp, ómirdiń jańa bir belesin bastamaq.
Qonys ıeleriniń qýanyshyn bólisý úshin Maqtaaral aýdanyna arnaıy kelgen Premer-mınıstrdiń orynbasary, tótenshe jaǵdaı jónindegi respýblıkalyq komıssııanyń tóraǵasy R.Sklıar, О́zbekstan Respýblıkasynyń sý sharýashylyǵy mınıstri Sh.Hamraev, Túrkistan oblysynyń ákimi О́.Shókeev turǵyndardy quttyqtap, baspana kiltterin tabys etti. Sonymen qatar, Maqtaaral aýdanynda oryn alǵan tótenshe jaǵdaı kezinde erekshe qyzmet atqarǵan bir top azamattarǵa Premer-mınıstrdiń Alǵys hattary tapsyryldy. Olardyń arasynda О́zbekstan Respýblıkasynyń Sý sharýashylyǵy mınıstri Shavkat Hamraev pen Tótenshe jaǵdaılar mınıstriniń birinshi orynbasary Abdýlla Kýldashov ta bar. Jańa shaǵynaýdan turǵyndarynyń qýanyshyna ortaqtasqan oblys ákimi О́mirzaq Shókeev qıyndyqtyń artta qalǵanyn aıtyp, ár otbasy úshin baspanalarynyń berekeli bolýyn tiledi. Sondaı-aq, oblys basshysy jańa móltek aýdannyń qurylysyna atsalysqan birqatar azamattarǵa Prezıdenttiń Alǵys hattary men "Halyq alǵysy" medalin tabys etti. "Sardoba sý qoımasyndaǵy bógettiń buzylýy shekaralas eki el úshin de ońaıǵa soqpady. Apat aıtyp kelmeıdi. Osy tosyn jaǵdaıdy estip, maqtaaraldyqtardyń taǵdyryna alańdaǵan Elbasy Nursultan Nazarbaevtyń qoldaýymen, Prezıdent Qasym-Jomart Toqaevtyń tapsyrmasymen memlekettik deńgeıde qoldaý kórsetildi. Zardap shekken aýyldardyń árbir azamaty qamqorlyqsyz qalmady. Búkil el bolyp kómek qolyn sozdy. Qıyndyqtar artta qalyp, osy sát ómirlerińizdiń jarqyn kezeńi bolsyn", dedi О́mirzaq Shókeev.
Aýmaǵy 70 gektar jerdi alyp jatqan jańa qalashyqtaǵy 386 úıge Jeńis, Jańaturmys jáne Dostyq eldi mekenderiniń turǵyndary kóship keletin bolady. Munda barlyq ınjenerlik ınfraqurylym tartylǵan. Joǵary jyldamdyqtaǵy ınternet jelisine qosylǵan. Sondaı-aq jańa shaǵynaýdanda 1200 oryndyq mektep pen bala-baqsha jáne dárigerlik ambýlatorııa salynýda. Balalardyń oıyn alańdary ornatylyp, aǵashtar otyrǵyzylǵan. Jelilik saıabaq pen gúl baqtary móltek aýdannyń kórkine kórik qosyp tur.
Saltanatty shara sońy merekelik konsertke ulasty. Turǵyndardyń qýanyshyn bólisken Premer-mınıstrdiń orynbasary R. Sklıar men oblys ákimi О́mirzaq Shókeev baspanaly bolǵan 2 otbasynyń shańyraǵyna kirip, qutty bolsyn aıtty.
