Búgingi tańda statıstıkalyq esep boıynsha qalada dene shynyqtyrý jáne sportpen turaqty túrde shuǵyldanýshylar sany 294 myń adamǵa jetken. Bul barlyq jastaǵy halyqtyń sportpen qamtylýy 27,8% ekenin kórsetedi. Jyl sońyna deıin atalǵan kórsetkishti 30%-ǵa jetkizý kózdelýde.
Bul jóninde búgin Shymkent qalasynyń ákimi Murat Áıtenovke 9 aıda atqarylǵan jumystar týraly esep bergen dene shynyqtyrý jáne sport basqarmasynyń basshysy Oleg Pochıvalov málimdedi.
Onyń aıtýynsha, qalada 856 sporttyq nysan tirkelgen. Odan ózge, sport alańshalaryn salýǵa 95 jer telimi anyqtalǵan. Onyń ishinde 9 jer telimine memlekettik akt alynǵan bolsa, qalǵan 86 jer boıynsha jumystar júrgizilýde.
Jer telimderin tıimdi paıdalaný maqsatynda Murat Áıtenov sala basshysyna tapsyrmalar júktedi.
"Qaladaǵy buqaralyq sportty damytýdyń konsepsııasyn daıarlaý qajet. Sonymen qatar bólingen 95 jer telimine salynatyn nysandardyń arnaıy kartasyn jasaý kerek. Onyń ishinde aýdan ákimderimen birge zerdeleý jumystary júrgizilip, shalǵaı eldimekenderde de sportty damytýdyń júıesi ázirlensin", - dedi qala ákimi.
Oleg Pochıvalov esep berý sátinde 1 qarashadan bastap alleıalarda jappaı sporttyq jattyǵýlar uıymdastyrylatynyn jetkizdi. Ýaqyty tańǵy 07.30-da jáne keshki 18.30-ǵa belgilengen. Halyq kóp jınalatyn sport alańdary retinde Abaı saıabaǵy, Metallýrgshiler saıabaǵy, Otbasy alleıasy, Qoshqar-Ata jaǵalaýy, Táýelsizdik saıabaǵy, Ortalyq saıabaǵy, Jeńis saıabaǵy, Dendrosaıabaq, Nursat shaǵyn aýdanyndaǵy alleıasy jáne Qajymuqan atyndaǵy Ortalyq stadıon tańdalǵan.
