Batys Qazaqstan oblysyndaǵy Qaratóbe aýdanynda nan baǵasy 5 teńgege qymbattady. Naýbaıshylardyń aıtýynsha, nannyń qymbattaýyna jol qatynasy baǵasy men gaz tarıfiniń joǵarylaýy basty sebep bolyp otyr.
Batys Qazaqstan oblysyndaǵy Qaratóbe aýdanynda nan baǵasy 5 teńgege qymbattady. Naýbaıshylardyń aıtýynsha, nannyń qymbattaýyna jol qatynasy baǵasy men gaz tarıfiniń joǵarylaýy basty sebep bolyp otyr.
Al, qalǵan irili-usaqty saýda oryndarynda nan baǵasy 70 teńgege baryp jyǵylady.
Aıta ketelik, nan baǵasynyń qymbattaýyna baılanysty kezekti lezdemede másele kótergen Qaratóbe aýdanynyń ákimi Ashat Shaharov bul máseleni kúndelikti baqylaýda ustaýdy tıisti mekeme basshylaryna shegelep turyp tapsyrdy.
– Azyq-túlik máselesi, sonyń ishinde nan ónimderiniń negizsiz qymbattaýyna eshqashan jol berilmeıdi. Bul másele týrasynda bosańsýdyń reti joq. Kúndelikti baǵany baqylaýda ustaý kerek. Ásirese, osy máseleni qadaǵalaıtyn mekeme basshylarynyń jumysy qarqyndy bolýy tıis, – deıdi aýdan basshysy Ashat Berleshuly.
Qaratóbe aýdandyq kásipkerlik, aýyl sharýashylyǵy jáne veterınarııa bóliminiń meńgerýshisi Kenjebek Aımashevtyń bergen málimetine súıensek, nan baǵasynyń qymbattaýy qazan aıynda baıqalǵan.
– Qazan aıynyń basynda nannyń baǵasy 45 teńge bolatyn-dy. Aı ortasynda 5 teńgege qymbattady. Búgingi tańda oblys boıynsha bizdiń aýdanǵa turaqtandyrý qorynan arzandatylǵan un bólinbeıdi. Sondyqtan satylymdaǵy un baǵasy joǵary bolǵandyqtan, naýbaıhanalarda nannyń baǵasy 5 teńgege qymbattady, – deıdi ol.
Aýdandaǵy jeke kásipkerler astyq ónimderin qaladan tasıdy. Jergilikti saýda núktelerinde joǵary sortty «BelesAgro» JShS-niń uny 3800 teńge, «Jelaev» astyq kombınatynyń uny 4000 teńge turady. Al, I sortty un 3300 teńgeni quraıdy.
Aýdan ortalyǵyndaǵy «Ystyq nan» naýbaıhanasy 1 jyldan astam ýaqyttan beri qaratóbelikterge qaltqysyz qyzmet etip keledi. Nan baǵasyna qatysty naýbaıhana qojaıynynyń da pikirin bildik.
– Naýbaıhanada 3 adam qyzmet etemiz. Táýligine 300 nan daıyndaımyz. Kóbine nan túngi ýaqytta pisiriledi.
Bizdegi satylymdaǵy nan baǵasynyń 5 teńgege joǵarylaýyna buǵan deıin oblystaǵy turaqtandyrý qorynan berilip kelgen arzandatylǵan unnyń toqtatylýy áser etip otyr. Buryn atalmysh qor arqyly I sortty 1 qap undy 2450 teńgege alyp kelgenbiz. Qazirgi tańda «Beles» pen «Jelaevtyń» unyn qaladan 2900 teńge baǵamen satyp alamyn. Jeke kóligim arqyly tasymaldap ákeletinimdi esepteńiz. Onyń ústine janar-jaǵarmaı da qymbattady, – deıdi naýbaıshy.
Ertaı BIMUHANOV.
Batys Qazaqstan oblysy,
Qaratóbe aýdany.
