– Qalalyq ákimdiktiń basty maqsatynyń biri – apatty úılerdiń turǵyndaryn jaıly ári jańa mekenge kóshirý. Eń bastysy, turǵyndardyń áleýmettik turmysyn jaqsartyp, jaıly orta qalyptastyrýdy qolǵa alyp otyrmyz. Sol sebepten jańa baspanaǵa kóp jyl boıy kezegin kútken azamattar qol jetkizip, júzdegen otbasynyń ómir súrý sapasy jaqsarýda, – deıdi qala ákimi Q.Orazbaev.
Shahar basshysynyń aıtýynsha, bıyl jyl basynan beri qaladaǵy 5 kóp qabatty úı men 4 jataqhananyń turǵyndary jaıly páterlerge qonystandy. Osy maqsat úshin turǵyn qorynan 410 páter bólindi. Endi jyl sońyna deıin taǵy 4 jataqhananyń turǵyndaryn jańa baspanamen qamtýǵa taǵy 403 páter bólý josparlanyp otyr.
– Mundaı baǵdarlama kelesi jyly da jalǵasyn tabady. О́ıtkeni bul – qalada kúrmeýli máselege aınalǵan apatty úıler turǵyndarynyń jaǵdaıyn jaqsartýǵa baǵyttalǵan memlekettik qoldaý sharalary, – deıdi Q.Orazbaev. – Eski úılerdi buzý baǵdarlamasymen birge, sol aýmaqtarǵa ınvestorlar tartý arqyly qoldanystaǵy ınfraqurylymdy paıdalana otyryp, shyǵyndardy únemdeý esebinen sapaly turǵyn úı qoryn qalyptastyryp, halyqqa usyný jumystary júrgiziletin bolady.
Jaqynda «Nursaıa» shaǵyn aýdanynda paıdalanýǵa berilgen jańa úıde 240 páter bar. Oǵan aldymen Gagarın kóshesindegi apatty jataqhana turǵyndary kóshirildi. Apatty jataqhanadan jaıly páterge kóshken Tanzılıa Ǵılajeva: «Buǵan deıingi kórgen qıyndyqtyń bárin umytatyn boldyq» dep qýansa, kópbalaly ana Jumagúl Aıtýarova: «Baspanaǵa ıe bolyp, baqyttan basym aınalyp tur» dep qýanyshyn jasyra almady.
Munaıly óńir ortalyǵynda jańadan boı kótergen shaǵyn aýdannyń qatarynda «Bereke» de bar. Munda «Nurly jer» baǵdarlamasymen birneshe turǵyn úı boı kóterdi. Jaqynda halyqtyń áleýmettik turmysy tómen toptaryna arnalǵan 72 páteri bar 9 qabatty úı paıdalanýǵa berildi. Atyraý qalalyq turǵyn úı-kommýnaldyq sharýashylyǵy, jolaýshylar kóligi jáne avtokólik joldary bóliminiń sektor meńgerýshisi Rafhat Joldıevtiń aıtýynsha, qazir turǵyn úı kezeginde 21 myń adam tur. Al memlekettik turǵyn úı baǵdarlamasymen berilgen jaldamaly páterlerdiń quny qymbat emes.
– Eki bólmeli baspana alǵan turǵyndar aıyna 7-8 myń teńgeden tóleıdi. Jyl aıaǵyna deıin taǵy da osyndaı tórt úı paıdalanýǵa beriledi. Sol úılerden taǵy da 300-ge jýyq otbasynyń jańa baspana alatyny josparlanyp otyr. Jalpy, jyl basynan beri 291 adamǵa páter berildi, – deıdi R.Joldıev.
Jańa baspana alý baqytyna bólengenderdiń qataryndaǵy Marjan Býrabaevanyń qýanyshynda shek joq. О́ıtkeni ol otbasymen birge páter jaldaǵanyna 13 jyl bolypty.
– Bireýdiń páterin jaldaýdyń mashaqaty kóp. Bir kúni «Sýdy kóp paıdalanba, elektr energııasynyń aqshasy kóbeıip ketti, páterimdi bosat» deýi múmkin. Mundaı sózderdi estisek te, soǵan shydap keldik. О́ıtkeni ózimizdiń basybaıly baspanamyz bolmady. Biz az qamtylǵan otbasylardyń sanatyndamyz. Sondyqtan 2008 jyly turǵyn úı kezegine tirkeldik. Endi mine, eki bólmeli páterge ıe boldyq. Otbasymyzben birge qýanyp ta, tolqyp ta turmyn. Páter bólmeleri keń ári jaryq. Jedelsaty jumys istep tur, – deıdi baspana taýqymetin tartqan Marjan Býrabaeva.
Atyraý oblysy
