Radıoelektronıka jáne baılanys áskerı-ınjenerlik ınstıtýty elimizdegi áskerı baılanysshylardy daıyndaıtyn jalǵyz oqý orny. Ol 2001 jyly qurylyp, 2002 jyldan bastap 5 jyldyq baǵdarlama boıynsha baılanysshy-kýrsanttardy oqýǵa qabyldaı bastady. Áskerı ınstıtýt qabyrǵasynda ofıser-baılanysshy mamandar "Baılanysty uıymdastyrý" jáne "Baılanystyń áskerı tehnıkasy" atalatyn eki kafedrada daıyndalady. Kafedra janynda zamanaýı zerthanalyq baza paıdalanýǵa berilgen. Instıtýt aýmaǵynda kýrsanttar praktıkalyq jáne taktıkalyq-saptyq sabaqtarda mamandyǵy boıynsha qarý-jaraq pen áskerı tehnıkany paıdalana otyryp, tájirıbe jınaqtaý úshin oqý-jattyǵýǵa arnalǵan stasıonarlyq baılanys toraby ornalastyrylǵan.
REjBÁII baspasóz qyzmetiniń málimetine sáıkes, oqytýshylardyń kásibı-pedagogıkalyq daıyndyq deńgeıleri joǵary, áskerı bólimderde ınjenerlik-tehnıkalyq laýazymdarda áskerı tájirıbe jınaqtaǵan. Olar biliktilikterin QR Tuńǵysh Prezıdenti – Elbasy atyndaǵy Ulttyq qorǵanys ýnıversıtetinde jáne Sankt-Peterbýrg qalasyndaǵy S.Býdennyı atyndaǵy Baılanys akademııasynda arttyryp otyrady.
Oqytý barysynda zamanaýı mýltımedııalyq proektorlar men jeke kompıýterlerde baǵdarlamalyq oqytý júrgiziledi. Áskerı ınstıtýttaǵy jańa úlgidegi tehnologııalardyń arqasynda múnda joǵary dárejeli áskerı mamandar daıyndalady. Oqýdy bitirgen soń bakalavr ataǵy berilip, áskerimizde bar qarý-jaraq quraldaryn erkin qoldaný qabiletin meńgerip shyǵady.
Ujymdyq qaýipsizdik kelisimi uıymynyń áskerı kadrlardy birlesip daıyndaý baǵdarlamasy boıynsha byltyrǵy jyldan beri Qyrǵyzstan memleketiniń ókilderi de "Baılanystyń áskerı tehnıkasy" mamandyǵy boıynsha bilim alýda. Radıoelektronıka jáne baılanys áskerı-ınjenerlik ınstıtýty qurylǵan 19 jyl ishinde 600 ofıser-baılanysshy bitirip shyqqan. Búginde olar elimizdiń Qarýly Kúshterinde jáne ózge de áskerı qurylymdarynda áskerı boryshtaryn abyroımen atqaryp keledi.
