Tasy órge domalap turǵan kásipkerlerdiń el qamyn jegen eńseli isterin kórgende kóńiliń kóterilip qalady. Yrys bitken, tolaıym tabysqa qoly jetken isker jandardyń endi bir ýaq zamandastarynyń jaıyn oılap, týǵan jeriniń qamyn oılap, dáýletiniń bir mysqalyn bólip, qaıyrymdylyq jasaýǵa umtylýy shyn máninde ǵanıbet emes pe?! Olar shalǵaıdaǵy shaǵyn aýyldardyń, ózderi tútinin tútetip otyrǵan týǵan topyraqtyń keıbir muń-muqtajyn sanalarymen salmaqtap, aqyl tarazysyna salyp, etek-jeńin qymtaýǵa qolushyn sozýda. Oblysta bıyl birneshe mektep, aýrýhana boı kóterip, mádenıet oshaqtary, sport jáne balalar alańdary salyndy. О́tpeli kezeńniń ókpek jeline qumyǵa tunshyǵyp, isi qojyrap bara jatqan mádenıet oshaqtarynyń oty qaıta mazdap, kitaphanalar jóndelip, jańa kitaptarmen tolyqtyryldy. Osynyń barlyǵy týǵan jerge degen perzenttik tańǵy shyqtaı móldiregen taza peıilden týyndaǵan kómek-qaıyrym.
Bıyl oblysta jalpy quny 5,5 mlrd teńgeni quraıtyn 840 áleýmettik bastama júzege asyryldy. Kórgen jannyń kózin qýantyp, kóńilindegi senimdi nyǵaıtatyn osyndaı ıgi sharalar arqyly 1 mektep, 9 sport alańy, 7 mádenıet oshaǵy tárizdi 21 nysan salyndy. 788 áleýmettik bastama júzege asyryldy. Onyń ishinde turmysy tómen otbasylaryna kómek, medısınalyq qural-jabdyqtar, dári-dármekter alyp berý, eldi mekenderdi abattandyrý tárizdi qaıyrymdylyq ister bar. Mundaı jan jadyratar jumystyń Kókshetaý qalasy men Býrabaı, Selınograd, Jarqaıyń, Zerendi, Sandyqtaý jáne Atbasar aýdandarynda keńinen qanat jaıyp otyrǵanyn aıta ketken lázim.
Kir jýyp, kindik kesken týǵan topyraǵynyń bolashaǵyn oılaý, soǵan qyzmet etý – eń aldymen árkimniń júregindegi aınymas adal sezim men adamgershilik qasıet ekendigi daýsyz. Osy oraıda, Tuńǵysh Prezıdent Nursultan Nazarbaevtyń kásipkerlerdi týǵan jerlerine kómek kórsetýge, janashyrlyq jasaýǵa shaqyrǵan biraýyz sózi de ıgi áser etkenin ekpin túsirip aıta ketken jón. Elbasy aıtqan salıqaly sóz sanalaryna jetip, kókirek kózderin ashqan kásipkerler bul baǵyttaǵy salmaqty da ımandy sharýaǵa kirisip ketti. Adamı boryshyn óteýge bel býǵan qaltaly aǵaıynnyń qolǵa alǵan sharýasy da ońynan oralýda. Istiń kózin biletin isker jandar bar jaıdy aqyl tarazysyna salyp, el úshin aldymen ne kerek ekenin, qaı sharýanyń basyn qaıyrǵandary aýyldastary úshin tıimdi bolatynyn baǵamdap, kúsh-qýattaryn jumyldyrýda. Aıtalyq, shalǵaıdaǵy Jarqaıyń aýdanyna qarasty Tasótkel aýylyndaǵy mádenı-demalys ortalyǵy kóp jyldan beri jóndeý kórmeı, júdep turǵan bolatyn. Aýyl jastarynyń bir ýaqyt dem alyp, kóńil kóteretin jerleri de osy. Al ol jumys istemese, kóńilderi júdep, bos ýaqyttarynda barar jer taba almaı, tomaǵa-tuıyq kúı keshetin. Osy jaıdy eskergen «Temirlan» seriktestiginiń basshysy Erlan Alın 95 mln teńgege qarajat bólip, ortalyqty qurylysshy qalaǵynan jańa shyqqandaı etip jóndep berdi. Jalǵyz jóndeý jumysy ǵana emes, ortalyqqa qajetti qural-jabdyqtardyń barlyǵyn syıǵa tartty. Qazir Tasótkel aýylyndaǵy ortalyq aýyl turmaq, oblys ortalyǵynyń ózinde sırek kezdesetin mádenıet oshaǵyna aınaldy. Atbasar aýdanyndaǵy «Nur 777» seriktestiginiń ujymy Tımashevskıı orta mektebine 24 mln teńgege jóndeý jumystaryn júrgizdi. Mekteptiń eski shatyry jańartylyp, terezeleri almastyryldy. Selınograd aýdanyndaǵy Qoıandy aýylynda jeke kásipker Plan Ahantaı jerlesterine 10 mln teńge qarjyǵa birinshi kezekte qajetti zattar men azyq-túlik satyp áperdi. Jomart jannyń qaıyrymdylyǵyna Qoıandy aýylynyń turǵyndary dán razy. Mundaı kómek qolyn sozǵan adamdar az emes. Jaqynyna janashyrlyq jasaýdan aıanbaıtyn izgi nıetti adamdardyń aq peıili kóńil súısintedi. Máselen, Arshaly aýdanyndaǵy kásipker Álibek Toqpaev Saryoba orta mektebine 9 mln teńgeden astam qarjy bólip, kómek kórsetti. Bıyl oblystaǵy ondaǵan mektep aq nıetti atymtaı jomarttardyń arqasynda táp-táýir jóndelip, birqatar máselelerin sheship aldy. Aqkól aýdanyndaǵy «Hleborob» seriktestigi Naýmov, О́rnek, Vınogradov mektepterine 2 mln teńgeden astam qarjyǵa jóndeý jumystaryn júrgizdi. Jalǵyz bilim oshaqtary ǵana emes, Naýmov aýyldyq Mádenıet úıi de jóndeýden ótkizilip, bir jańǵyryp qaldy. Oblys ortalyǵyndaǵy «Krıstall» saýda ortalyǵy Soltústik Qazaqstan oblysyna qarasty Saýmalkól aýylyndaǵy Balalar úıin baýyryna tartyp, 2 mln teńgege kıim-keshek pen oqý quraldaryn satyp áperdi. О́zge de jalpaq jurtqa, qaltaly azamattarǵa úlgi bolar sharalar az emes. Aıtalyq, Sandyqtaý aýdanyndaǵy «Baıdaly» seriktestiginiń ujymy Veseloe aýylyndaǵy kópirdi jóndep berdi.
Jaqsy iske jan súısinedi. Qoǵam meıirimnen ajyramaǵan eken. Izgiliktiń izetti nury tórt qubylamyzda shalqyp tur. Soǵan qarap, shúkirshilik etemiz. Bul jaqsylyq talaı adamnyń jan júregin baýrap, senimin nyǵaıta túsýde. Kókshetaý qalasyndaǵy «Alýa stroı» seriktestiginiń basshysy Erlik О́mirǵalıev kópbalaly otbasyna turǵyn úı tartý etti. Bul da bir aıta qalarlyqtaı sharýa boldy. Qala jurtshylyǵy Erlik Qaıdarulynyń erlikke para-par izetti sharýasyn eń aldymen shıetteı balalarǵa jasalyp jatqan qaıyrymdylyq dep uqty. Qulaqtanǵan jurt azamattyń osy bir aıta qalarlyqtaı isine razy bolyp, balalar úshin qýandy. Birjan sal aýdanyndaǵy «Semizbaı U» jáne «KazBıf LTD» ujymdary kópbalaly, áleýmettik jaǵynan az qamtamasyz etilgen otbasylaryna qarasýdy óz mindetteri sanaıdy. Kásiporyndardyń qamqorlyǵynan tyl eńbekkerleri, jetim-jesirler men múgedekter tys qalyp otyrǵan joq. Bıylǵy jyldyń ózinde ǵana osyndaı otbasylarǵa 3 mln teńgeden astam qarjyǵa kómek kórsetilgen.
Aýyldyq jerdegi mádenıet mekemelerin qoldaý da óte mańyzdy. Bul oraıda da aýyz toltyryp aıtýǵa laıyqty sharalar az emes. Aıtalyq, Selınograd aýdanyndaǵy «Shalqar» seriktestiginiń basshysy Dýlat Qamzebaev 80 mln teńgege aýyldyq klýb salyp berdi. Ǵajap emes pe?!
Elbasy erekshe yqylaspen aıtqan týǵan jerdi qasterleý, súıý degenimiz – osy! Elin súıgen erlerdiń elge degen qurmeti zamandastaryna jaqsy úlgi bolsa qanekeı!..
Aqmola oblysy
